Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XVI.

Van der edelheit der tweester vrouwen die hertoghe Anthonijs hadde, ende van Willeme haren sone.

Dese edel vrouwe wel ghemeit
Hiet dedelste van kerstenheit.
Hertoghe Anthonijs ende si
Bestonden ten derden, dat segghic di.
Die paus, der zaken gheinformeert,
Heefter mede ghedispenseert.
Die IIII^de keiser, die Karle hiet,
Was haer oudervader, en lieghe u niet;
Ende coninc Jan van Vranckerijk
Was oudervader desghelijc
Van Anthonise, den vromen man;
Ende die selve coninc Jan
Van Vranckerike, die edel heere,
Hadde ghetrout met grooter eere
Skeisers suster, dits waer bediet,
Die IIII^de, die Karle hiet.
Aldus was haer oudervader,
Dit onthout wel algader,
Ende Anthonijs oudermoeder
Gherechte zuster ende broeder.
Ten vierden bestont si warichlijc
Den goeden keiser Heinrijc,
Die van eenen jacopine
Was vergheven met venine.
Van Behem die coninc Jan
Ghinc haer ooc ten derden an.
Jan hiet haer vader, dits waer bediet,
Die hertoghe van Gorlietz hiet.
Die coninc Wencelijn van Rome
Ende van Behem, hier op gome,
Ende die coninc Zeghemont
Van Hongheren, dat si u cont,
Die namaels, dat si u verclaert,
Ooc keiser van Rome waert,
Waren haer oome alle beide.
Conink Jan, daer ic af seide,
Van Behem, verstaet algader,
Was haer overoudervader;
Sijn dochter hadde te huwelijc
Conink Jan van Vranckerijc,
Ende die was, des sijt vroeder,
Hertoghe Anthonijs oudermoeder.
Dese vrouwe Lijsbeth, dit versinne,
Was van Gorlietz hertoghinne,
Ende hertoghinne van Lutzenborch,
Mercgravinne van Brandenborch,
Ende mercgravinne van Luserlant.
Vol dogheden soe was si becant.
Eenen sone wan, des sijt wijs,
An haer hertoghe Anthonijs,
Dien men te Bruessel met weerdichede
Te Sinte Goedelen kersten dede.
Het hieffen hertoghe Willem
Van Beieren, ic seker bem,
Greve van Henegouwe, van Hollant,
Ende ooc heere van Zeelant,
Ende hertoghe Jan, sijt seker das,
Van Beieren, die elect was
Van Ludike, ic en lieghe u niet.
Willem dat die sone hiet;
Maer hi sterf jonc. Hi wart gheleit
Tonser Vrouwen bruederen met zeericheit,
Onder die tomme van vrouwe Johanne;
Sijn doot beweende wijf ende manne.