Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XIII.

Hoe hertoghe Anthonijs dede aerbeiten om een ander vrouwe te wive te hebbene, ende hoe hiere omme sant, ende wie die heeren waren, ende hoe si hare zaken volquamen.

Hertoghe Anthonijs, die edele heere,
Die biden wille van Onsen Heere
Verloren hadde sijn ierste vrouwe,
Vergheten soe moesti dien rouwe.
Die dede nu sonder beiden
Om een andere arbeiden,
Die van doeghden, van state, van bloede
Beteemde ende hem te nemene stoede;
Ende heeft in sinen rade vonden
Dat hi ten utersten heeft ghesonden
Om een hooghe gheboorne vrouwe
Inghelbrechte greve te Nassouwe,
Heere ter Leck ende te Breda;
Ende met hem trac, alsic versta,
Willem greve te Zeyne aldaer,
Heere tot Sinte Aechtenrode, dats waer;
Ende met hem trocken wel bewant
Riddren, knapen uut Brabant
Wel tot twee hondert peerden toe.
Desghelijc soe sant ooc doe
Karle die coninc van Vranckerijc
Ende hertoghe Jan derghelijc
Van Bourgognen in dit perlot
Den bisscop van Chalons ende Reinier Pot,
Met hondert peerden wel bereit,
Om der zaken wille voorseit,
Ende int selve ambassiaet
Tot den coninc van Behem, dat verstaet,
Ende tot van Ungheren den coninc rijc.
Si trocken cort ghewaerlijc
Na den strijt van Ludik, doe ic ghewach,
Ende porden op Sinte Lucas dach;
Ende toghen voort al te samen
Tot dat si te Praghen quamen
In dat Beemsche conincrijc.
Van daer trac voort eerbaerlijc
Die bisscop van Chalons, ende met hem
Van Zeyne jonchere Willem,
Al tot Oven in Hongherien
Tot bi den coninc, hoordic lien,
Van Ungheren; wat soudict langher maken?
Si volquamen hare zaken.