Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XI.

Hoe hertoghe Anthonijs in sinen sin opsette hem des twists in gheenre siden tonderwinden, nemaer meinde met sinen edelen ende steden van Brabant die te accorderen; welke aerbeit al te vergheefs wert ghedaen.

Tusschen desen, des sijt wijs,
Was die hertoghe Anthonijs
Seere begaen te dien tiden:
Men boot hem van in beiden siden
Groot goet, dat des was ghenoech;
Maer sunderlinghe hi seere woech
Dat van Perweis die heere
Sijn man, sijn ondersate weere.
Ter ander siden sach hi an,
Dat sijn brueder hertoghe Jan
Van Bourgognen, hoort dat ic scrive,
Ghetrouwet hadde teenen wive
Hertoghe Jans suster, si u cont,
Van Beieren; ende te menegher stont
Screef hem sijn brueder, door sijn houde,
Dat hi bistendicheit doen soude
Sinen zwager van Beieren ter noot.
Tusschen al desen die hertoghe sloot,
Anthonijs, in sinen rade claer,
Stille te sittene, het en waer
Dat sijn brueder die zake aen name
Ende sinen zwagher te helpen quame
Selve, metten live; als dat ghesciede
Soe woude hi ende sijn liede
Met sijnre macht comen dan
Bi sinen brueder den hertoghe Jan.
Daer diende ooc ander redene toe
Dat stille sat die hertoghe doe,
Ende die was dese: om dat hi niet
Om enich goet oft om gheniet,
Dat men hem gheven mocht tien tide,
Vallen wilde aen eneghe side;
Maer met grooter ghetrouwicheden
Bi sinen edelen ende goeden steden
Arbeide hi zeere ernsteliken
Om die partien te verliken:
In welken vervolghe wert ghedaen
Groote cost ende moeyte, sonder waen;
Ende arbeide even heet
Tot opten dach dat men street.
Als hertoghe Jan des was wijs,
Van Beieren, dat hertoghe Anthonijs
Dus was ghesloten in sinen raet,
Hielt hi niet op, sonder verlaet,
Hi en deder omme soe lanc ghepijn,
Dat van Bourgognen die zwagher sijn
Ende hertoghe Willem, si u bekant,
Greve van Henegouwe ende Hollant,
Sijn brueder, met uutnemender macht,
Die si te samen hebben bracht,
Beide int lant van Ludike quamen.
Als die van Ludike dat vernamen,
Braken si op van vore Tricht,
Ende toghen thuuswert te richt,
Met opsette, meinende claer
Dat si des anders daeghs daer naer
Uut comen souden al met allen,
Om die heeren te bevallen:
Dat si hem uten lande mids dien
Emmer niet en souden ontvlien.