Brabantsche yeesten. Les gestes des ducs-de-Brabant par Jean de Klerk d'Anvers (3 delen)

IX.

Hoe die van Ludeke ende van Tricht dat bestant dat hertoghe Anthonijs tusschen hen ghemaect hadde braken ende elc andren groote scade daden.

Hier voren es u wel bekant
Hoe Anthonijs maecte bestant
Tusschen die Ludikeren entie stat
Van Tricht, dwelke dat
VI weken soude hebben gheduert,
Als ic u voren hebbe gheruert.
Maer als die hertoghe was ghesceiden
Van daer, waert sonder lanc verbeiden
Tbestant ghebroken, ende daer af
Die een partie der ander gaf
Die scout van dien, hoort mi verclaren,
Segghende dat si dierste waren
Die ghebroken hadden tbestant.
Mids desen es hertoghe Jan te hant
Van Beieren comen sonder begheven
Binnen der stat van Tricht voorscreven,
Met vele volcs van wapenen;
Daer maecte hi, ic seker ben,
VI capiteine in corter stont:
Den heere van Heynsberghe, si u cont,
Her Sceiffaerde van Merode der met,
Den vooght van Coelne, dat wet,
Den vooght van Alpen, ende den heere
Van Rey, ende daer toe meere
Den heere van Milendonck, dits claer;
Ende elc van desen, dat es waer,
Capiteinen, ic zeker ben,
Hadden omtrent onder hem
Drie hondert ghewapende te peerde,
Om te dienene daer hijs begheerde,
Sonder die borgheren, verstaet tgedicht,
Vander voorseider stat van Tricht.
Ende her Heinric van Hoorne, sijt seker das,
Van Perweis, die momboir was
Des lants van Ludike, die es te richt
Comen voor die stat van Tricht
Metter ghemeinten met moghentheden
Van Ludike ende van Loon mede,
Ende heeft die beleghen met allen,
Ende al omme ende omme bevallen,
Int voorseide jaer, doe ic ghewach,
Opten XXIIII^sten dach
Der voorseider maent van novembri;
Ende daer vore soe bleven si
Ses weken lanc ligghende also,
Tot seven in januario,
Daer naest volghende. Binnen welcken tide
Die van Ludike, als ic u lide,
Ende die van Loon, dats sonder waen,
Veel meer oorbaers hadden ghedaen
Dan si daden, in menegher voude;
Maer die overtolleghe coude
Belette hen, sijt seker das;
Want doen soe coude winter was,
Dat op S^t-Mertens dach began
Te vriesene, ende vervolghde vast an,
Eenpaerleec, sonder ophouden,
Elf weken lanc, dat van couden
Minschen ende beesten storven opt velt.
Van couden wort menich minsche gequelt,
Ende, opten XXVIII^sten dach
Van januario, men sach
Die ijse scoren onversien,
Van welcken quam seer groot messchien
Van molenen, van brugghen te menegher stat,
Ende andersins ooc, verstaet dat;
Ende na dat die Ludikaren
Entie Looneers opgebroken waren
Van voor Tricht, ende thuus ghetoghen,
Soe hielden groote oorloghen
Beide partien onderlinghe,
Ende een ridende oorloghe sunderlinghe,
Ende daden scade menegherleie
Toten inde der maent van meie.
Int jaer ons Heeren, sonder saghe,
XIIII^c VIII, ten dertichsten daghe
In meie, es Tricht met meneghen man
Van die van Ludike, hout u der an,
Ende die van Loen mechtichlijc
Anderwerf beleit herdelijc;
Ende sijn daer vore bleven, sonder wanc,
Meer dan XVI weken lanc;
Toten XXII^sten dach, dats waer,
Van septembri bleven si daer.