Brabantsche yeesten. Les gestes des ducs-de-Brabant par Jean de Klerk d'Anvers (3 delen)

VIII.

Van dat die hertoghe van Orliens te Parijs doot ghesleghen waert.

Int selve voorscreven jaer
XIIII^c sevene, cort daer naer,
In november den XXIII^sten dach,
Wert (dat die meneghe mach
Claghen, beide arm ende rijk)
Doot ghesleghen hertoghe Lodewijk
Van Orliens, des sijt wijs,
Bi nachte in tstat van Parijs;
Welke slach leider! ghesciede
Bi eeneghen, hertoghe Jans liede
Van Bourgognen, des sijt vroeder,
Die was hertoghen Antonijs outste broeder.
Hertoghe Lodewijk, merket tgone,
Was hertoghen Jans ooms sone,
Ende daer toe eens conincs kint,
Ende eens conincs brueder, dit versint,
Van Vrankerike, sijt seker des.
Van welken slaghe sint comen es
Vele jammers ende meneghe plaghe,
Ende noch ghesciet alle daghe.
Al eest alsoe dat dit woort
Tot onser materien niet en hoort,
Nochtan wi hier af mentie maken,
Overmids dat sommeghe saken
Claer hier uut ghesproten sijn,
Die namaels in die redene mijn
Ende tonser materien selen horen
Gheset te werdene: moetic dit voren
Tiersten rueren ende overslaen;
Soe seldi na te bat verstaen
Saken die hier uut sijn gheresen.
Hier met latic dit goet wesen.