Brabantsche yeesten. Les gestes des ducs-de-Brabant par Jean de Klerk d'Anvers (3 delen)

II.

Hoe hertoghe Anthonijs justicie, wet ende vonnesse dede ghelijc over die rike, alsoe over die arme.

Als hertoghe Anthonijs was ontfaen
Here ende prince, cort daerna saen
Dede hi ghescien hier ende daer
Groote justicie ende swaer
Over alle roekeloose gasten,
Die de arme liede verlasten
Bi sijnre vrouwen moyen tide:
Daer mense creech, in elke side,
Die darm volc plaghen te transeneren.
Voete af te slane, te foortseren,
Die dede hi rechten onghelet,
Voet voor voet, let voor let,
Ende hilt justicie int Brabantsche perc.
Al over al, alsoe sterc,
Dat men in Brabant niet meer en sach
Soe vele steltghenghers alst plach.
Die steltmakers, mids desen dinghe,
Verloren al haer neringhe;
Want men behoefder nu niet meere,
Alsoe alst plach wilen eere,
Bi vrouwe Johannen tide; sonder scop,
Elc huedde hem voor den achterclop.
Hets een oud segghen van overlanc:
En dooch gheen ors sonder bedwanc.
Gheerne gaf hi enen iegheliken
Audiencie, armen ende riken,
Ende hoordese selve gheerne spreken,
Toonen haer clachten, haer gebreken,
Om daer omme zeere scerpelijc
Te versiene, als claerlijc
Hier namaels noch sal sijn bescreven,
Wil mi God die gracie geven.