Brabantsche yeesten. Les gestes des ducs-de-Brabant par Jean de Klerk d'Anvers (3 delen)

De tenuere van den brieve van den peyse, die den hertoge van Gelre gaf.

XCIX.

Wi Willem van Gulicke, bi den ghedoge
Van der gracien Gods, hertoghe
Van Gelre, van Gulick, dat versinne,
Ende greve van Zuutphenne,
Doen te wetene ende te versinnen
Eenen iegeliken, ende herkinnen
Met desen lettren jegenwordichlijc,
Dat in deer Gods van hemelrijc,
Ende sijnre moeder gebenendijt,
Ende om salicheit ende profijt
Ons lants, ons volcx, ende onderseten
Die nu onder ons sijn gheseten,
Ocht namaels mochten, si u verclert,
Hebben ghetraitiert ende gheacordert
Metten eerwerdighen in Gode bekant
Her Jan van Beyeren, elect ghenant
Van Ludecke, onsen brueder hoghe,
Enen peys van sulcken orloghe,
Gheschille, dissencien, ende ghebreken,
Als tusscen ons heeft gesteken,
Onsen landen, onsen lieden, mids dat
Wi tsamen orloge hebben ghehadt,
In der manieren blikelijc
Hier na bescreven: dat iegelijc
Ghepeist sal sijn, groot of clene,
Op sijn erve, ende op sijn leene,
Dode voer dode, brant voer brant,
Roef voer roef, si u bekant,
Ghevanghene voer ghevangene met,
Ranchoene, financhen quijt gheset,
Die noch onbetaelt sijn bleven,
Ranchoene ende gelt uutghescreven
Daer voer date des briefs, sijts ghewes,
Tpayement af ghevallen es,
Ende alle gheloften mede,
Die men ghemein heet oervrede,
Die donderseten, wilt verstaen,
Ons liefs brueders hebben ghedaen
Ons, ocht onsen vorseten,
Hertoge van Gelre, wilt weten,
Die schelden wi te deser tijt
Gheheelijc ende al quijt.
Vort, alle onderseten, sijt vroeder,
Ende coepliede ons liefs broeder,
Elect van Ludick, selen te hant
Paysibelijc in ons lant
Liden, ende converseeren,
Incomen ende weder uut keeren,
Ende, of ghebrec hier in ghesciede,
Soe willen wi dat ons dienstliede
(Daer onder die ghebreke ghesciedden),
Comen surcoersen die coeplieden,
Met al harer mogentheit,
Sonder eenighe listicheit.
Ende vort sal mijn heer Baudwijn
De jonghe, gheheten van Mommardijn,
Sijn slot Seyenhoven, weder ende vort,
Hebben met al sier toebehoert,
Ende sulker gheloften wesen quijt,
Als hi ghedaen heeft in ons profijt.
Vort van allen saken mede,
Dissentien of ghebreclijchede,
Mids welken dorloghe es gheheven
Tusscen onsen brueder vorscreven,
Soe sijn wi bleven van al der sake,
Na antworde ende na aensprake
Van beiden siden, sijt des vroeder,
In ij raetslieden ons liefs broeder,
In ij van onsen rade, dat wet,
Ende ij van der Capittelen met,
Ende in ij met voersienicheit
Rade van Ludeke der chiteit,
Ende al dat die rade voerghelesen,
Die hier toe selen ghecoren wesen,
Uutspreken selen, met enicheit,
Dat hebben wi hertoge voerseit,
Voer ons, ende ons nacomers mede,
Voer ons lant, ons volc, bi sekerhede
Gheloeft, gheloven, in goeder trouwen,
Vast en sonder breken te houwen,
Al ergenlist uut gheseit.
Ende of dese rade vorseit
Niet en verenighden te prononchieren
Haer uutsprake, in gheer manieren,
Met acorde al te gader,
Soe sal ons lieve heere ende vader,
Hertoghe Aelbrecht, van Beyeren ghenant,
Greve van Henegouwe, van Hollant,
In den vorseiden saken, dats chertein,
Gheloeft sijn te wesen souverein,
Sijn uutsprake daer af te verclaren,
Binnen den naesten drie jaren,
Na date des briefs, met wijshede.
In desen peis sijn vorwaerde mede
Dat thestant, dat es ghemaect
Tusscen onsen brueder wel geraect,
Elect van Ludicke, te desen tide,
Ende ons ter ander side,
Na inhout der brieve, ghemaect van desen,
Niet en sal daer met ghebroken wesen,
Ende alst bestant es ghefineert,
Soe sal den peis onghefraudeert
In virtute bliven, sijts ghewes,
Alsoe hier boven voerscreven es.
Vort selen wi hertoge als boven
Desen peis doen gheloven
Ende bezegelen, met enicheden,
Onsen iiij goeden steden
Ons lants van Gelre, ter stonde,
Als Nijmegen ende Ruermonde,
Arnhem, ende Zuutphenne mede.
In orconde der waerhede
Hebben wi, met rechter wetentheit,
Den segel onser heerlicheit
Drucken doen aen desen brieve,
Int jaer Ons Heeren met rechter lieve,
Als XIII^c stont ghescreven
Ende acht ende negentich daer neven,
Ende ghesciede op eenen disendach
Die sesthiene in julio lach.