Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van eenre nuwer dinc, die binnen dier tijt te Bruessel ghesciede.

XCVI.

Doen si uut togen, dat es u cont,
Dat was voer Sent Jans avont,
Ende daer ware, onghelogen,
III scepenen niet uut ghetogen,
Ende op Sent Jans avont
Sant vrou Johanne terstont,
Alsoe dat ghewoenlijc es,
Met haren amman, sijts ghewes,
Seven nieu scepenen, ende van dien
Mocht men de sesse int theer sien;
Die sevenste, die die joncste was,
Eedde damman, sijt seker das.
Ende dus die joncste scepen reet,
Doen hi ghedaen hadde sinen eet,
In theer, tot voer der Nuwer Stat:
Daer eedde die joncste, verstaet dat,
Scepene sijn ander ses ghesellen,
Dies men noit eer en hoerde tellen.
Doen wert verandert, si u bekant,
Die lage van den scepenen te hant;
Want iiij nuwe scepenen, sonder waen,
Namen tregement doen aen,
Metten capiteinen vermogen;
Die ander drie sijn thuus ghetogen,
Ende regerden die stat vort aen,
Die sonder wet hadde ghestaen,
Ocht sonder enich regement,
Van Sent Jans avonde oit sent
Tot harer comst, in weet hoe veel dagen,
Dan dat die rentmeesters toe sagen.