Brabantsche yeesten. Les gestes des ducs-de-Brabant par Jean de Klerk d'Anvers (3 delen)

De copie van den verbonde tusscen Brabant ende Ludeke.

XCIV.

Johanne, bi der gracien Ons Heeren,
Hertoginne, Gode ter eeren,
Van Lutzenborch ende van Lothrike,
Van Brabant, van Limborch desghelike,
Mercgrevinne des heilegen rijcs.
Wi, meesters, ende scepenen desghelijcs,
Rade ende universiteit der stede
Van Loven, Bruessel, ende Bossche mede,
Thienen, Leeuwe, Nivele, daer na
Liere, Herenthals, Diest,Breda
Ende Berghen op den Zoem,
Voer ons, ende dandre, nemt goem,
Steden van Brabant, ter eender side,
Ende wi, meesters ter ander side,
Ghesworne, gouverneurs, raet, universiteit
Van Ludeke der goeder citeit,
Van Huy, van Tongren, elc mercke,
Sentruiden, Loen, Hasselt, Hercke,
Blyse ende Eyke mede,
Voer ons ende dander goede stede
Des bisdoms van Ludeck gemeinlijc,
Ende sgraefscaps van Loen desgelijc,
Ter ander siden, dat verstaet;
Wi, meesters, gouverneurs, gesworen raet
Van Tricht ende universiteit,
Toebehorende der heerlijcheit
Van onser gheduchter vrouwen rijc,
Ende slants van Ludeck, desgelijc,
Gheheellijc van beiden siden,
Doen te weten, te desen tiden,
Allen den ghenen die desen
Jeghewordeghe lettren selen lesen,
Hoe seker verbonde ende vast bestant
Tusschen wilen hertoge Janne van Brabant,
Vader van ons hertoghinne,
Wiens siele dat God bekinne,
Ende den goeden steden vorseit,
Beide der lande met enicheit
Ghemaect, besegelt sijn, over lanc,
Ewelijc te dueren, sonder verganc,
Soe claerlijc in de lettren, sijts ghewes,
Daer op ghemaect, begrepen es,
Welcke verbonde, voer waer gheseit,
Bi onscalcker versuementheit
Niet en hebben gheusert ghewesen,
Ende gheen versuec of clein van desen
Van enegher siden, wilt verstaen,
Tot hier toe en heeft gheweest gedaen,
Om dat wi bevoelen dat eenicheit
Ende acort der lande vorseit
Van Brabant, van Ludecke, ende van Loen
Seer profitelijc waer ende scoen,
Te vueden ende tonderhouden mede
Comenscap, ende orborlichede
Der vorseide lande, met minlicheit,
Wi hebben die verbonde vorseit
Gheexamineert ende oversien,
Ende avijs ghehadt van dien
Met riper deliberatien vri,
Ende noch soe bliven wi
Bi den selven verbonden eenpaerlijc,
Duerende voert aen eewelijc,
Voer ons, ons oer, in der manier
Als navolgende staet bescreven hier;
Dats te wetene, van nu vort aen,
Tegen alle die op mochten staen
Met bannieren ontploken, of met pingnoene,
Den lande van Brabant scade te doene,
Den goeden steden, ende gemein lant
Des bisdoms van Ludick, si u bekant,
Des graefscaps van Loen, wilt weten,
Die aldernaeste daer gheseten,
Daer men die scade wilde beginnen,
Sal derwert trecken, ende oprinnen,
Entie vianden wederstaen te hant,
Bescudden ende stercken Brabant,
Ende desghelijc oec mede
Tplat lant ende die goede stede
Des bisdoms van Ludeke derghelijc,
Tegen enen yegelijc,
Die enich der lande vorscreven hier
Oploep dade eneghertier.
Die naestghesetene, altijt vort aen,
Sal pinen die viande te wederstaen,
Ende ocht die sake vorder were
Versocht, dat met ghebannen here
Die goede stede van Brabant,
Uut togen, soe selen te hant
Die stede van Ludeke, sonder vertrecken,
Ghehouden sijn met uut te trecken
Tegen yegeliken boude
Die tdlant van Brabant schadegen woude,
Binnen viij dagen, sonder sparen,
Na dat sijs versocht waren;
Ende al met deser selver voeghe,
Ocht iement schade ocht hinder droege
Den bisdom van Ludeke, ocht eneger stede,
Des graefscaeps van Loen mede,
Selen die steden van Brabant
Met hen uuttrecken te hant.
Item, dat die goede stede vorseit
Des bisdoms ende der graeflijcheit
Van Loen in engheenre maten
Eneghen viande in selen laten,
Die schadegen wilden den lande
Van Brabant, eneghe provande
Ocht ander goede enegertiere
Laten ghebruken, in gheer manieren,
Copen noch vercopen mede,
Ende desghelijc die goede stede
Van Brabant en selen emmer niet
Des oec ghedoegen, wats gheschiet,
Dat men enegen vianden sal
Laten ghebruken, groot of smal,
Die den lande van Ludicke waer contrare,
Ocht van Loen eneghe ware,
Om ghelt, om have noch om miede.
Item, dat alle coepliede,
Van beide den landen, wie si weren,
Sekerlec selen gaen ende keeren,
Deen onder dander, met vreden,
Ende haer comescap besteden
Over de Mase, ende op desside,
Van nu vort ane, tallen tide;
Ende alsulken recht, si u bekant,
Als die coepliede van Brabant
Int bisdom van Ludick, sonder helen,
Ende int lant van Loen betalen selen,
Selen die coepliede, sonder verhalen,
Van Ludicke in Brabant oec betalen,
Behouden altijt, nu ende echt,
Van beide den landen der heeren recht.
Item, sulken recht ende dienstlijchede
Alst lant van Ludicke ende van Loen mede
Sculdich sijn te doene te hant
Den goeden steden van Brabant,
Soe sijn wi schuldich troulijc,
Wi hertoginne, ende desgelijc
Die goede stede sunderlinge
Van Brabant, ende ons nacomelinge
Te doene, met ghetrouwicheden,
Der stat van Ludicke, den anderen steden
Des lants van Ludick, der graeflicheit
Des lants van Loen, sonder listicheit.
Ende ocht, in toecomenden tiden,
Gheschil opstonde in eneger siden,
Der lande vorseit of enich der lede
Van eneger der goeder stede,
Soe eest ons mein, van ons allen vorseit,
Op dat tgheschille worde afgheleit,
Dat binnen viij dagen saen,
Na dat tversuec ware ghedaen,
Ghecoren worden iiij persone,
Van elcker siden, ende die ghone
Werdich wesende te richt,
Binnen viij dagen binnen Tricht
Trecken selen, sonder beiden,
Ende nemmermeer van daer scheiden,
Bi harer sekerheit, sine hebben besocht,
De waerheit, ende tacorde brocht
Die dissencie, daer ghi mi af hoert schriven,
Op dat tverbont mach eewich bliven;
Altijt behouden die hoecheiden,
Juridixcien ende heerlicheiden
Van ons hertoginne, wilt mercken,
Des bisscops ende der heiliger kercken.
Ende bi alsoe dat dit accort
Ende tvorscreven verbont ghehouden wort
Van pointe te pointe, sonder breken,
Sonder daer jegen iet te steken,
Soe eest dat wi ons obligeren,
Deen metten anderen, met begheeren,
Op hondert dusent ouder schilde,
Ocht yement ware die breken wilde
Tverbont, alsoet es voerscreven,
Dat hi den ghenen sal moeten geven
De helicht van der sommen voerseit,
Ende dander des heeren heerlicheit,
Die bi den verbonden bleven,
Al ergelist uut ghescreven.
In orconde der waerheit
Wi, hertoginne voerseit,
Ende wi steden voerghenant
Van Ludeke ende van Brabant,
Alsoe si hier voren staen bescreven,
Hebben consent hier toe ghegeven,
Ende ons zegele met lieve
Uuthangende ghedruct aen dese brieven,
Ghemaect, bezegelt ende ghegeven
In tstat van Diest, als stont ghescreven
Dusent CCC, dat es waer,
Ende tachtentich ende achtien jaer,
Na costume, verstaet den sin,
Des hofs van Ludeke, maer een jaer min
Soe screef men ghewarichlijc
Int bisdom van Camerijc,
Om dat ghesciede, sijts ghewesse,
Tusscen Paesschen ende Kerstmesse,
In sprokille den vj^en dach,
Int jaer voerscreven, doe ic ghewach.