Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe Wouter van Over Rijn tShertogenbossce gericht was daer dorloge weder om begon, tusschen Brabant ende Gelderlant.

LXXXVIII.

Als vrou Johanne, hoert mi verclaren,
Ende hertoge Willem een deel jaren
Gheweest hadden in goeden vreden,
Beide haer lande, haer volc, haer steden
Onderlinge hadden ghefrequentert,
Ende allen comenscap ghehantert
Alsoe si vortijts hadden gheplogen,
Voer tbegin deser orlogen,
Als XIII^c stont ghescreven
Ende vier werf twintich tien ende seven,
Soe ghevielt, op enen sondach,
Na Sinte Jans Baptisten dach
Dat men Ons Vrouwen omme droegh
TSertoghenbossche, aldaer ghenoegh
Geldersche quamen, sijts ghewes,
Soe dat jaerlijcs ghewoenlijc es.
Onder vele andre te dien termijn
Quam daer Wouter van Over Rijn
Die doen scoutheet of amtman was
Des hertoge van Gelre, sijt seker das,
Te Bomelerwerde, verstaet den fijn.
Dese selve Wouter van Over Rijn
Met meer Gelderschen te worde quam
Jeghen eneghe, soe ict vernam,
Ingheseten portren, op dien dach,
Daer si teerden in een ghelach,
Alsoe dat si seere gheringhe
Vechtende worden onderlinghe.
Wouter ende die met hem vochten
Riepen Gelre! Gelre! wat si mochten.
Als die andre dat vernamen
Gelderschen hen te hulpen quamen,
Diere ten Bossche een groot conroet
Vergadert was, ende daer bleef doet
Gosen van der Diesen, die dienere was
Vrou Johannen, ende, mids das,
Haer cleeder aen hadde ter selver stede:
Porter ten Bossche was hi oec mede.
Ende van der Gelderscher siden
Bleven oec dode, ten selven tiden,
Ende vele ghevanghene, voer waer,
Van den Gelderschen bleven daer.
Die vorseide Wouter van Over Rijn
Bleef oec ghevangen, ende int fijn
Wort hi van den live gherecht,
Om dat hi selve int ghevecht
Met sinen swerde, dat hi trac,
Gosene van den Diesen doerstac,
Ende hootsheere was ende principael
Van der saken altemael,
Ende Gelre! Gelre! ierstwerf riep,
Daert volc met te gader liep;
Mids welken opsette soe scheen dat
Hi tSertogenbossche die stat
Vrouw Johannen van Brabant
Ontweldeghen woude, ende in hant
Van den Gelderschen aldus bringen.
Cort daer na dat dese dingen
Aldus ten Bossche waren bedreven,
Heeft hertoghe Willem ghescreven
Sijn brieve aen der hertoginnen,
Hoe si wel wiste ende was te binnen
Dat Wouter van Over Rijn, sijn raet,
Sijn amptman, ende sijn ondersaet,
Met meer anderen sier dienaren
Binnen harer stat comen waren
Van tSertogenbossche, in trouwen fijn,
Die den vorseiden Wouter van Over Rijn
Ghericht hadden, sonder verdraghen,
Ende vort sijn dienren doot gheslagen,
Sijn liede ghevangen, ende ghesmeten;
Mids welcke hi begerde te weten
Ocht van Brabant die edel vrouwe
Haer die sake aentrecken wouwe,
Die dus ten Bossche waer ghedaen,
Of dat sijs ledich wilde staen;
Soe begerde hi dat si, sonder verlaet,
Teenen sekeren dage haren raet
Te Ravenstein volmechtich sonde,
Jegen den sinen, om daer ter stonde
Hem richtinge te doene, ende bescheit
Te ghesciene van der saken voerseit;
Ende, of sijs ledich wilde staen,
Soe begherde hi voert aen
Dat si hare voerseide stat
Van den Bossce onder wese, dat
Si hem dade rechtinghe
Hier af, ende beteringe;
Ende, ocht hem tien dage niet
Rechtinge hier af en gheschiet,
Soe meinde hi daer na te staen
Dat hem rechtinge worde ghedaen,
Ende meinde hier met, openbare,
Hem hebben ghequijt jegen hare.
Hier af begherde hi van inde torde
Haer bescreven antworde.
Vrou Johanne, sonder begheven,
Heeft hem antworde dus ghescreven:
Dat si daer gerne schicken woude
Van haren rade, die hem soude
Onderwisen ende aenbringen
Claer bescheit van desen dingen,
Ende aldus, doe ic ghewach,
Na meer scrivens, soe wort die dach
Te Ravenstein gheleit alsoe,
Int jaer vorscreven, drie in augusto;
Maer want men aldaer die dingen
Te ghenen ghevuege en cost ghebringen,
Mids dat van Gelre die hertoghe
Grote betringe hiesch ende hoghe,
Die vrou Johanne, sijt seker das,
Soe si meinde, niet schuldich en was,
Na der saken ghelegentheit,
Want het al in haer heerlijcheit
Ende harer stat rechte, dats claer,
Van tSertoghenbossce geschiet waer.
Dus bleef hangende dit gheschilde,
Ende die sake ginc int wilde.