Brabantsche yeesten. Les gestes des ducs-de-Brabant par Jean de Klerk d'Anvers (3 delen)

De namen van den heeren die den pays tracteerden.

LXXXVII.

Hertoginne Johanne van Brabant
Ende hertoghe Willem van Gelderlant
Coren elc, met goeder stade,
Ses edel manne uut haren rade,
Die onder hen xij ghemein
Trecken souden te Ravestein.
In den iersten coes die edel vrouwe
Mijn her Sweder van Opcouwe,
Heer van Gaesbeke, van Putte, van Strien,
Ende daer na den edelen vrien
Heer Thomase, van Diest heere,
Joncheere Willem van Zeyne, ende meere
Willeme, heere van Cranendonck,
Ende her Janne, die niet en was blonc,
Van der Calsteren, een ridder wert,
Ende her Heinrick, si u verclert,
Van der Lecke, den wisen vromen.
Die hertoghe van Gelre heeft ghenomen
Om peis te makene, sonder erch,
Gheraerde, heere van Werdenberch,
Ende voert meer, doe ic ghewach,
Heer her Willeme van Muysbach.
Noch nam hi daer, in dat bestel,
Van Gusten her Wernier Buffel,
Ende her Herman van Lievendale.
Dese waren ridders altemale;
Waelraven van Oyen, vroem ende stout,
Ende van Rays Reinout.
In dese xij heren vorscreven
Sijn ses in beiden siden bleven.