Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van der dachvaert ten Bossche ende wes daer ghedaen wort.

LXXXI.

Op doctave van der Triniteit,
Daer die dachvaert op was gheleit,
Heeft men ter dachvaert daer vernomen
Den hertoghe van Bourgognen comen,
Philips, den edelen wisen heere,
Ende sconincs raet, met groter eere.
Over vrou Johannen side,
Die welke, te dien selven tide,
Buten den Bossche, in dat groene,
Tenten sloegen, ende pauwellioene,
Om dat den staet van den heeren
Niet binnen en conden ghelogeren;
Maer vrou Johanne ende haer ghesinne
Die trocken alle ten Bosche inne.
Die hertoge van Gelre, dat es waer,
Es oec ter dachvaert comen daer,
Ende es oec buten ghelogeert,
Als dander heeren, vore vercleert,
Ende hertoge Aelbrecht vorscreven
Die es binnen Hoesdin bleven,
Ende heeft ten Bossche ghesonden
Greve Willeme, ten selven stonden,
Van Oestervant, sinen sone:
Een chele soe bracht die ghone
Van sinen vader, ten Bossche inne,
Aen die edele hertoginne,
In junio den sestienden dach,
Die int jaer Ons Heeren lach
XIII^c thachtentich ende seven.
In dier chelen stonden ghescreven
Vele ghebreke, si u bekant,
Daer de hertoge van Gelderlant
Hem af becroende, wilt versinnen,
Over der edelre hertoginnen,
Welcke ghebreke, een noch gheen,
Ter dachvaert en dienden, groot no cleen,
Daerom laeticse achter bliven,
Ende sal u tslot der dachvaert scriven;
Want, dat ic screve altemale
Aensprake ende wedertale,
Het souden wesen lange dingen,
Ende luttel orbors inne bringen;
Maer tslot daer af seldi verstaen,
In de tente buten den Bosch gedaen,
Mids vele redenen van ghebreke,
Die vrou Johanne claerleke
Den hertoge van Gelre over sede,
Daer hi haer te clein in dede;
Want hi niet en hilt te recht
Duutsprake van hertoge Aelbrecht,
Daer hi die soene met corrumpeerde.
Die hertoge contrarieerde
Die worde van vrou Johannen.
Die heeren ende die wise mannen
Hebben die saken van der partien
In beiden siden aenghesien,
Ende hebben, met wisen sinne geraect,
Aldaer een uutset ghemaect,
Soe dat die hertoge Aelbrecht
Hem informeren soude te recht,
Met wiser deliberatie,
Op die vorseide pronunciatie,
Soe verre alst daer aen mocht rueren,
Dat hi die soude doen volvueren,
Met rechte ende metter daet,
Binnen half oeghste, sonder verlaet,
Alle redenen aenghesien
Van alle beiden den partien;
Ende dit aldus volbracht,
Voor alle werc, soe bleef die macht
In den hertoge Aelbrecht vort,
Alle andre gebreke ende discort
Te aenhoeren, van elker side,
Ende die te slichten binnen den tide
Van den naesten Paeschdach,
Van allen ghescillen dat hangen mach
Tusscen die partien vorscreven.
Hier af hebben brieve ghegeven
Van submissien, met ripen sinne,
Die hertoge ende die hertoginne,
Dit te houden, stade ende vast,
Ende binnen dier tijt gheenen last
Te laten ghesciene, bi haren weten,
Op enich van den onderseten
Van Brabant, of van Gelderlant.
Dit wert besegelt; daerna, te hant,
Schiet dat heerscap minlike,
Ende elc trac tot sinen wike,
Hopende seker sijn van desen,
Dat hier met warich peis sal wesen.
Sint dat die dachvaert aldus schiet
Hertoge Aelbrecht niet af en liet
Om te vorderen die dingen,
Die sinen seggene aengingen;
Maer, wat hi daer toe ghedede,
Tusscen half oeghst, noch Paesschen mede,
Soe en conde hi int ghone
Gheonderwisen sinen sone
Van Gelre, noch daer toe berueren
Dat hi sijn seggen wilde volvueren,
Te betren des hi hadde mesdaen.
Dus es tbestant uut ghegaen.
Tusscen beide de lande vorscreven
Es dorloge weder op gheheven.
Eer ic dit vorder wil verclaren,
Soe sal ic u ierst openbaren
Wes binnen deser tijt gheschiet
Voer Gaesbeke; dat emmer niet
En behoert te sine vergheten.
Dan sal ic u vort doen weten
Van den orloghe tcovenant
Tusscen Brabant ende Gelderlant.