Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Vrouwe Johanne van Brabant ende hertoge Willem van Gelre staefden hertoghe Aelbrechts seggen met haren brieven.

LXXVIII.

Doen hertoge Aelbrecht hadde ghebroken
Den twist, ende peis uut ghesproken,
Als ghi hier voren hebt ghehoert,
Gaven si brieve rechtevort
Vrou Johannen van Brabant,
Ende Willem van Gulicke, si u bekant,
Hertoghe van Gelre, dats waer,
Op den derden dach daer naer,
Deen den anderen, in beiden siden,
Daer in bekennende tien tiden
Tsegghen dat hertoge Aelbrecht
Uut hadde ghesproken, goet ende recht,
Ende bezegelden, beide ghelijc,
Den peis te houdene stendichlijc,
Voer hen ende oec voer al
Haren hulperen, groot ende smal,
Als in die brieve claerlijc
Begrepen es volcomelijc,
Daer ic af in dese partie
Soude hebben gheset die copie;
Maer het en docht mi genen noot,
Want tseggen den peis verclaert al bloot.
Als dese brieve waren bescreven,
Daer die swone met was ghegeven,
Trac hertoghe Albrecht in Hollant,
Ende vrou Johannen in Brabant
Van den Bossche daer si lach.
Theer men oec op breken sach
Van vore den Grave rechtevort;
Ende elc trac daer hi behoert
In Brabant, soe hi eerst mochte.
Dus was ghevelt dit gherochte,
Desen twist, ende dese onminne.
Die van Bruessel quamen inne
(Van der stat die goede lude)
Op Sint Simoens avont ende Sint Jude;
Ende vort een iegelike stede
Togen thuus, in haren vrede,
Ende meinden wel, na mijn scriven,
Dat goeden peis hier met soude bliven,
Ende dat si in beiden siden souden
Hertoge Aelbrechts uutsprake houden;
Maer cort gheschieter af tcontrare,
Als ghi horen selt hier nare,
Bi wat redenen ende saken
Die Geldersche den peis braken,
Ende sunderlinghe om saken drie,
Ic sal u seggen hoe ende wie.