Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hertoge Aelbrechts verclaren op den peis vorscreven.

LXXVII.

Aelbrecht, bi Gods genaden fijn
Palensgreve opten Rijn,
Hertoghe in Beyeren, ende rewaert
Van Henegauwen, si u verclaert,
Van Hollant, Vrieslant, Zeelant mede,
Doen cont allen nu ter stede,
Dat wi van sulcken orlogen,
Heisch, gheschille, ghebreke, als mogen
Onse lieve moye van Brabant
Ende ons sone van Gelderlant
Deen ten anderen hebben ghehadt,
In beiden siden, twelcke dat
Si in ons sijn ghebleven,
Over mids hueren brieven, ons gegeven,
Van compromisse, die welke si
Ons over gaven, daer af dat wi
Gheloeft hebben, in goeder trouwen,
Ende gheloven wel te houwen
Onse seggen te prononchieren,
Te utene in der manieren,
Tusscen dit ende sint Jans mes
Naest commende, soe verre als wi des
Goetlijc conden toe ghebringen,
Al ergelist in desen dingen
Uut gheceiden, des seker sijt.
Ende of wijt binnen deser tijt
Also niet wel ghedoen en conden,
Soe gheloven wi, tesen stonden,
Onse seggen uut te gheven
Na tenuer der brieve vorscreven,
Van den vorseiden compromisse,
Binnen Paesschen naest Sent Jans misse
Naest comende, dats te weten claer
Van Paesscen naest comt over een jaer,
Alle ergelist uut gheseit.
In orconden der waerheit
Desen brief bezegelt ende gegeven,
Ter plaetsen ende ten date vorscreven.