Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hertoghe Aelbrechts uutsprake van den peise tusscen Brabant ende Gelderlant.

LXXVI.

Aelbrecht, palesgreve bekant,
Op den Rijn ende in Beyerlant
Hertoghe, dat si u verclaert,
Regeerdere ende ruwaert
Van Henegouwe, van Hollant,
Van Zeelant ende van Vrieslant,
Doen cont alle goede manne:
Want ons lieve moye, vrou Johanne,
Hertoginne wide bekant
Van Lutzenborch ende van Brabant,
Si, als van der eender side,
Ende ons lieve sone, te desen tide,
Her Willem van Gulick, verstaet den sin,
Hertoge van Gelre, greve van Zuytphen,
Ter ander side, beide met wille
Bleven sijn van allen ghescille,
Orloge, heisch, of aenspreken,
Ochte enegherhande ghebreken,
Die si ghehadt hebben, tot deser stont,
Als die compromisbrieve doen cont,
Die wi van hen iegelijc
Hebben begripen claerlijc,
Soe seggen wi voren inne
Onse lieve moye, die hertoghinne,
Van Lutzenborch ende van Brabant,
Ende onsen sone, van Gelderlant
Hertoghe, ende van Zuitphen heere,
Met malc anderen vort meere,
Haer hulpers, ende haer onderseten,
Ende bi namen es te weten
Weemaer, van Cuyck heere,
Ende Jan sijn sone, ende meere
Al haer hulperen, daer met
Her Aernt van Hoemen, dat ghijt wet,
Heer van Amersoyen stout,
Ende sijn sone Reynout,
Met haren hulpers, tesen tiden,
Van allen veeden in beiden siden,
Die ghesciet sijn ocht bedreven,
Sint dat ons sone van Gelre vorscreven
Wert onser moyen viant,
Ende des lants van Brabant,
Ghesoent wel ende wettichlijc,
Met voegen hierna claerlijc
Bescreven ende gheopenbaert:
In den eersten is verclaert
Dat ons moye, die hertoginne
Van Limborch, van Brabant, sal staen inne
Allen den rechten, sijt seker das,
Der stat van den Grave, soe si was
Voer den orloghe, si u bekant,
Tusscen Brabant ende Gelderlant.
Item, dat een iegelijc
Sal staen, es hi arm ocht rijc,
Op sijn leen ende op sijn goet,
Alsoe hi te voren stoet,
Ende namelic, mercket tgone,
Weemaer van Cuyck ende Jan sijn sone,
Her Arnt van Hoemen, ende Reynout
Sijn sone, in alle der ghewout
Van haren leenen ende goeden,
Alsoe si hier te voren stoeden,
Ende dat male weder met lieve
Over hebben sal die brieve
Daer si dese leene vortiden
Hueren heerscape in beiden siden
Mede hebben opghedregen,
Ocht met brieven daer tegen
Weder verlien in al der manieren
Alsoe sijt hielden. Vort prononcieren
Wi ende seggen altehant
Roef jegen roef, brant jegen brant,
Dode jegen dode, tot deser tijt,
Al onbetaelt gelt, al ghevangen quijt,
Van beiden siden, wie si waren,
Behoudelec daer in ons verclaren
Van den heisscen ende ghebreken,
Ocht enegherhande aenspreken,
Die ons moye, ocht ons sone
Hebben mochten om tgone,
Deen op den anderen, des sijt ghewes,
Om sake die vorleden es;
Al ergenlist uut ghesceiden.
In orconde der waerheiden
Soe hebben wi met lieve
Onsen zegel ghehangen aen desen brieve,
Des dijsdaegs tot Huesden, doe ic ghewach,
Na der xi dusent meeghden dach,
Int jaer Ons Heeren ghebortenesse
Dusent III^c tachtentich ende sesse.