Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Dopnemen van hertoge Aelbrechte tusschen vrou Johannen ende hertoge Willem.

LXXV.

Hertoghe Willem, daer ic af scrive,
Hadde ghetrout tot eenen wive
Hertoge Aelbrechts dochter, si u verclaert,
Van Beyeren, die tier tijt was ruwaert
Van Hollant ende van Zeelant,
Ende van Henegouwe; want
Hertoge Willem al noch leefde,
Sijn brueder, die sier sinne reefde,
Die hi hilt te Keynoit in der stede
Ghevangen, die vortijts duutsprake dede
Tusschen den hertoge Wencelijn
Ende grave Lodewijc, den neve sijn,
Als dese cronike dede vermaen
Hier voren, daert behoerde te staen.
Als die hertoghe Aelbrecht
Van deser saken wert berecht,
Dat sinen sone van Gelderlant
Aldus campelijc was bewant,
Dat hi met machte, te dier tijt,
Den Brabantren en gheenen strijt
Leveren en dorste, noch en mochte,
Quam hertoge Aelbrecht, ende besochte
Vrou Johannen, ten Bossce binnen,
Om te tracterene met minnen,
Tusschen mier vrouwen van Brabant
Ende sinen sone van Gelderlant,
Ende heeft die sake alsoe bedreven
Dat sijs beide in hem bleven,
Ende gaven hem beide, des sijt ghewisse,
Hare brieven van compromisse,
Onder haren zegel, dats waer,
Int selve voerscreven jaer
Van LXXXVI, doe ic ghewach,
Op der xj dusent meegden dach,
Ende elc gheloefde, bi sier trouwen,
Sijn seggen vast ende stede te houwen,
Ende te voldoene, sonder breken,
Wes hi daer af soude uutspreken
Op sulken ghescillen ende orloghen,
Heissche, ghebreke, als si mogen
Deen dander hebben aenghelecht.
Hertoge Aelbrecht heeft toegheseght
Ende gheloeft beide den partien,
Gheboret, in toecomenden tien,
Dat enich van hen dat seggen brake,
Ende niet en hilde sijn uutsprake,
Ende niet en vervulde, noch doen en woude
Tgone dat hi uutspreken soude,
Dat hi den ghonen dan met machte,
Die tseggen hilde ende volbrachte,
Bi vallen soude int openbare,
Ende den anderen contrare.
Doen sijs aldus waren bleven,
Ende brieve daer af hadden gegeven
Van submissien, dats claer bediet,
Die hertoghe Aelbrecht van daer sciet.
Ende toegh tot Huesdin in der stede.
Des dijnsdaegs daerna hi uut sede
Pais ende soene, in der maniere
Als ghi hierna selt hoeren schiere.