Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe here Aert van Hoemen den hertoge Willem sijn leen op seide.

LXXIII.

Willem van Gulcke, van Gelre hertoge,
Was jonc ende van moede hoghe,
Ende lange soe droegh tregement
Van hem, dat si u bekent,
Her Aert van Hoemen, heere vorbaer
Van Amersoyen, van Middelaer,
Dwelcke dat hi hilt ghemene
Van hertoge Willeme te leene.
Daer na ghevielt, si u verclaert,
Dat her Aert ontset waert
Tot Utrecht, al in der stat,
Ende daer aenverde alle dat
Regement, groot ende clene,
Die proest van Aldemonster allene
Van den hertoge Willem.
Dus wies tusscen her Aerde ende hem
Een onminne, ende een hatie;
Maer die proest hadde die voeghdie,
Tgelove ende tvorespreken,
Daer met hi achter heeft ghesteken
Her Aerde van Hoemen, soe dat hi
Den hertoge niet en mochte comen bi,
Die des gram was ende ghestoert.
Daerom soe screef hi hem rechtvort
Sijn leen op, al te hant,
Ende wort sijn open viant,
Ende wert hulpere mier vrouwen
Van Brabant, die hi met trouwen
Diende, ende met moede hoege,
In desen ridenden oorloge,
Tegen die Geldersche, als die stoute,
Met sinen sone Reinoute.