Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe heer Otte van Cuyck quittance gaf van den V^m ponden swerte tournoise.

LXXI.

Die selve heere Otte, dats waerhede,
Van Cuyck ende van Heverle bede,
Heeft quitancie ghegeven
Van v dusent ponden vorscreven
Swerten tornoyse, in rekeninghe
Den ouden groten voor xvj penninge,
Die hertoge Jan van Brabant
Hem sculdich was, mids dat hi dlant
Van den Grave ende die stat
Hem op hadde ghedragen, dat
Sijn eigen goet was, te voren,
Ende manscap hem daeraf gesworen,
Ende van hem te lene ontfaen,
Als ghi voeren hebt verstaen.
Heer Otte van Cuyck, ghewarichlijc,
Heeft hem bekent, volcomentlijc,
Van der somme voer verhaelt
Ghenoech ghedaen, ende wel betaelt,
Ende quitancie daer af gegeven,
Onder sinen segel ghescreven
Te Bruessel, in Ons Heeren jaer
XIII^c XXVIII, naer
Die octave, doe ic ghewach,
Der heilegher apostelen dach
Sinte Pieters ende Sinte Pauwels mede.
Noch sijn die brieven in werdichede,
In vaster hoeden, si u bekant,
Des hertogen ende tslants van Brabant.