Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van den verbonde dat die stede van Brabant maecten binnen der tijt, dat die hertoge te Nyegghe lach.

LVII.

Die stede van Brabant saghen aen
Dat die hertoghe lach ghevaen,
Die welcke maecten onderlinghe
Tsamen een vergaderinghe
Te Bruessel, binnen derselver stont,
Daer si maecten een nuwe verbont,
Ende sekerden daer ende swoeren,
Ende gheloeveden te volvoeren
Ende te houdene in sijn stede
Den cartere van Cortenberge ende mede
Den carter van den walschen lande,
Ende vort oec alderhande
Cartren, privilegien, vriheden,
Usagen, herbringen der steden,
Alsoe sise hadden ghecostumeert,
Ghehouden, gehandelt, ghewiseert,
Alsoe si elcken van den steden
Verleent waren, in tide verleden,
Van hertogen of van hertoginnen,
Met pointen, die binnen
Den brieven claer begrepen stonden,
Van den voorseiden verbonden,
Mids welken verbonden, ende ander dinghen,
Die sint ghescieden, cortelinghen,
Na dat die hertoge Wencelijn
Los was der vangenesse sijn.
Dat die hertoghe in evel nam
Ende te Genepien liggen quam,
Ende bereet Nivele die stat,
Als ic na sal seggen bat.
Dit verbond gheschiede, dats waer,
Te Bruessel, in Ons Heeren jaer
XIII^c tseventich ende een,
Dat dus die stede over een
Droegen, op den achtienden dach
Die in februario lach.