Van Gheerde van Obies ende van her Willem van Rees.
LVI.
Twee hertogen, dats claer ende waer,
6310[regelnummer]
Ende een mercgreve waren daer,
Met leeuwen verwapent, die van daer scieden
In drie manieren, hoerdic bedieden:
Deen hertoge gevangen, dander doot,
Die mercgreve met ghenuchten groot,
6315[regelnummer]
Goetsmoets, vrolijc, ende in hogen,
Als die neder hadde ghetogen
Sine viande ende verwonnen,
Dat hem God des hadde gheonnen
Ende tgeluc der avontueren;
6320[regelnummer]
Des mocht hi Gode tallen uren
Vortaen dancken al sijn leven,
Die hem den seghe hadde ghegeven
In dien dage, entie victorie
Aldus verleent. Die istorie
6325[regelnummer]
Die sal u nu vort verclaren
Hoet met
Geerde es gevaren
Van Obies, goet ende ghetrouwe,
Provost te Bijns, in Henegouwe,
Daer ic u wilen eer af seide,
6330[regelnummer]
Die met sijnre vromicheide
Her Willeme van Rees, dats waer,
Sekerde ende vinc: daer naer
Wert hi in der persse groot
Selve ghevangen in der noot.
6335[regelnummer]
Her Willem van Rees, die des niet
En wiste, dat alsoe was ghesciet,
Dat sijn meester bleef ghevaen.
Na dat dien strijt was ghedaen,
Cort daerna, soe es hi comen
6340[regelnummer]
Te Bruessele, ende heeft vernomen
Na sinen meester al dat hij mochte,
Diene vinc; maer, wat hi sochte,
Beide aen riddren ende aen knechten,
Niemant en cost hem berechten
6345[regelnummer]
Van sinen meester, noch doen gewach;
Want hi tier tijt gevangen lach
Metten Brabantren in Guulkerlant.
Als her Willem niet en vant
Noch en veriesch en gheen niemare,
6350[regelnummer]
Bleef hi te Bruessel daer nare
Liggen, wachtende die heere boude
Often iemant eischen soude,
Alsoe langhe, dats ware tale,
Dat die Brabantre altemale
6355[regelnummer]
Hen selven hadden gheransoneert,
Ende waren weder thuis ghekeert.
Metten anderen es weder komen
Gheert van Obies, ende heeft vernomen
Dat sijn ghevangen te Bruessel ware,
6360[regelnummer]
Ende sijns meesters wachte daer.
Gheert thoende hem daer met ghenent
Sinen wapenroc, daer hi bekent
Bi heeft dat hi sijn meester was,
Diene vinc, ende mids das
6365[regelnummer]
Dede hi als een man ghetrouwe,
Ende volghde hem na in Henegouwe,
Des men her Willeme van Rees seere,
Waer mens vermaende, sprac groot eere,
Dat hi hem alsoe trouwelike
6370[regelnummer]
Hadde ghequijt; des arm ende rike
Doecht ende eere van hem spraken.
Geert liet hem sijn rantsoen maken,
Te voegheliker, hoerdic bedieden,
Dat si van een met minnen schieden.
|
|
Auteursrechtvrij