Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe hertoge Wencelijn voere Ravenstein trac, ende liet onghewonnen staen.

XLVII.

Als die hertoge Wencelijn
Een stuc in Brabant hadde gesijn,
Bi der hertoginnen Johannen,
In solace, met sinen mannen,
Met vrouden herde menegertieren,
Jagen, vlieghen, ter rivieren,
Tornieren, steken, ende ander spel
Ghehantert, soe hi dat wel
In ghenuechten const volbringen,
Danssen, hoven, reyen, springhen,
Met vrouwen ende met joncfrouwen,
Dede hi menege feeste houwen
Te Bruessel, in de goede stede,
Ende bi wilen elder mede.
Als dus die tijt was omghegaen
Omtrent een jaer, es op ghestaen
Een onminne ende gheworren
Tusscen van Valkenborch ende van Borne
Den heere, ende den hertoge
Wencelijn, die met moede hoghe
Trac, met riddren ende met cnapen,
Voer Ravenstein, daer hi dede maken
Eenen beer, starc ende groot,
Daer hi met dede groten noot
Die waren binnen Ravenstein.
Der assaulte meer dan ein
Die hertoge daer voren dede;
Maer die van binnen hare leden
Niet en spaerden, maer hen werden,
Dat hen dassaute luttel derden,
Alsoe dat hertoge Wencelijn
Dat niet en creegh ten wille sijn,
Maer brac op, cort daer na saen,
Ende lietet onghewonnen staen.