Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe hertoghe Wencelijn ende vrouwe Johanne de Possessien van den vorscreven mercten der stad van Antwerpen confirmeerden.

XXXVIII.

Ende na die doot, si u bekant,
Des derden Jans van Brabant,
Boven dat hertoge Wencelijn
Ende vrou Johanne, die vrouwe sijn,
In harer blider incomst swoeren
Der stat van Antwerpen te volvoeren
Al haer recht, van doen vort an,
Soe verleenden si nochtan
Int jaer Ons Heeren, doe ic ghewach,
In december den ix^en dach,
Als men screef int openbaer
XIII^c ses ende vijftich jaer,
Der stad van Antwerpen met lieve
Haer besegelde open brieven,
Die possessie der mercten stantichlijc
Vort an te ghebruken payselijc,
Si, haer oer, ende nacomelinghen,
In possessien ende hebbingen
Der mercten vorseit, onbrekelijc
Te houden, ende te doen houden eewelijc.