Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe keiser Heinric de vorschreve drie mercten der stad van Antwerpen heeft gheconfirmeert, ende wederroepen tghene dat hertoge Jan daer af der stad van Mechelen verleent hadde.

XXXVII.

Als die van Antwerpen dat verstaen
Dat die hertoge dit hadde ghedaen,
Dat hi die mercten vorseit
Aldus te Mechelen hadde gheleit,
Die tot Antwerpen van rechtswegen
Van ouden tiden hadden ghelegen,
Alsoe men die vorseide stat
Ende dmarcgraefschap van Ryen dat,
Beide te gader alghemeene,
Van den keiser hilt te lene,
Ende dit met wille ware verleit
Te Mechelen, sonder wetentheit
Des keisers, daer hi de stat af hilt
Van Antwerpen, waren si soe ghewilt
Ende lietent weten notabelijc
Den goeden keiser Heinrijc
Van Lutsenborch, die swager was
Van hertoge Janne, als ic vore las,
Welc keiser Heinric, int eerste jaer
Sijns rijes, gheinformeert wert claer
Van deser sake, screef al te hant
Aen hertoge Janne van Brabant,
Sinen swager, int openbare,
Dat hi des mechtich niet en ware,
Sonder consent eenpaerlike
Des keisers van den roemschen rike.
Entie keiser heeft, groot ende smal,
Tverleggen wederroepen al,
Ende restitueerde die stad
Van Antwerpen in al dat
Si vercort waren, alst es vorseit,
Ende van sijnre keiserliker mogentheit
Den vorschreven hertoge Jan
Van srijcs wegen van nieus vortan
Te lene te houden, alsoe hi dede
Te voren, eer hi te Mechelen lede
Die mercten; beval ende gheboot
Den hertoghe, met ernste groot,
Dat hi die mercten, daer wi af scriven,
Der stat van Antwerpen liet bliven,
Ende wedervaren, ongefraudert,
Soe hijt hadde gerestitueert,
Ende dat hi, uut ocsuyne van desen,
Tverleggene der mercten voerghelesen,
Negheens sins ghedoegen en woude,
Dat enich goet liden soude
Vorbi Antwerpen der stede,
In hinder of in verderflijchede
Des leens van den roemscen rijc,
Ende om dat die keiser Heinrijc
Wilde ende begerde van inde torde,
Dat dit aldus ghehouden worde
Vaste, sonder verbreckelijcheit,
Heeft hi van sijnre mogentheit
Sijn segel ende brieve ghegeven,
Doen vestegen ende bescreven,
Int jaer Ons Heeren, doe ic ghewach,
Als men dusent ghescreven sach
CCC ende IX, int openbare,
In sijns riken iersten jare,
In november ter vierder kalenden,
TAntwerpen soude men die brieve venden.
Dus bleef van Antwerpen die stat
In haren rechten, die si voere dat
Ghehouden hadden, ende vort an
Bi den andren ende derden Jan
Es hen die possessie bleven,
Van den drien mercten vorscreven.