Hoe die tweeste hertoge Jan van Brabant verleende der stat van
Mechelen de mercten van soute, van vische, ende van haveren.
XXXVI.
Om dat men sal sijn te binnen,
Ende den rechten oerspronc kinnen,
4035[regelnummer]
Soe seldi weten, alghemeen,
Dat int jaer XIIIc ende een
Die bisscop van Ludeke opdroegh,
Met wille ende met ghevoech,
Van Brabant
den anderen hertoge Jan,
Mechelen hadde alghemeene,
Met alle den rechte, groot ende cleene:
Dus heeft hi Mechelen ontfaen,
Ende die stat heeft hem ghedaen
4045[regelnummer]
Hulde ende eet, met groter eere,
Ende ontfangen over heere.
Ten tiden, doen gheschiede dat,
Gaf die hertoge der selver stat
Vele pointen, ende articulen mede,
4050[regelnummer]
Van rechte, met vorwaerdichede,
Met condicien ondersproken claer.
Onder al ander pointen aldaer
Heeft hi hen gegeven ende ghesterct
Van vissche, van haveren, van soute die merct,
4055[regelnummer]
Dat die te Mechelen soude sijn gheset,
Ende alderhande vlot onghelet
Varen soude, vlieten ende keeren,
Sonder belet van allen heeren;
Behoudelic in allen dinghe
4060[regelnummer]
Sinen rechte sunderlinghe.
Ende hier af gaf hi der steden
Seghel ende brieve, ende heeft gebeden
Sinen magen, groot ende cleine,
Ende sinen steden, int ghemeine,
4065[regelnummer]
Loven, Bruessel,
Nivele,Thienen,
Bossche, Leeuwe, die hem dienen,
Dat si dit, te sijnre bede,
Met hem besegelen wouden mede,
Dwelcke die steden, die vorschreven staen,
4070[regelnummer]
Te sijnre beden hebben ghedaen,
In oirconde der waerheit claer,
Als men screef Ons Heeren jaer
XIIIc ende een, doe ic ghewach,
Op der goeder sente Lucien dach.
|
|
Auteursrechtvrij