Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe bi ordenancien des conincs van Vranckerijcke greve Lodewijc van Vlaendren, de jonghe, die stat van Mechelen opghedregen heeft Heinrike van Limborch, hertoghe Jans sone van Brabant.

XXXII.

Als greve Lodewijc vorscreven
In den strijt dus doot was bleven,
Liet hi na hem eenen sone:
Lodewijc hiet oec die ghone.
Met desen sone Lodewijc
Overquam die coninc van Vranckerijc
Dat hi, om sekere (wilt mi verstaen)
Recompensacie, die hem ghedaen
Die coninc heeft, ende bekent,
Soe dats die grave wel was content,
Mids welken hi heeft willichlike
Op ghedragen Heinrike,
Hertoge Jans outste sone,
Alle trecht dat hadde die ghone
In de stat van Mechelen te voren,
Met allen haren toebehoren,
Los, vri ende quijt van al,
Om dat te behouden, groot ende smal,
Ende te ghebruken vastelike
Vort allen dagen eewelike,
Voer hem, sijn oeir, in allen dingen,
Ende sinen nacomelingen,
Van Brabant sijnde hertoge hoghe,
Sonder dat die vorseide hertoghe
Jan, ocht Heinric sijn sone,
Ocht enighe andre persone,
Enichsins sullen ghehouden wesen
Te betalene, hoert mi lesen,
Den grave Lodewijc tenegen male
Die lxxxvj dusent riale
Ende vijf hondert, verstaet die dinge,
Oft enighe andre penninge;
Ende desghelijcs, verstaet den fijn,
Sal Heinric onghehouden sijn
Manschap te doene (hout u daer an!)
Den grave, ocht enigen man
Dan den bisscop van Ludeke, wilt mercken,
In den name van sijnre kercken,
In sulker formen ende manieren
Als die mechelsche princieren
Van outs dat sijn ghewoen te doene.
Die coninc gheloefde den hertoge coene
Van Brabant, ende Heinrike sinen sone,
Haren oeire, ende alle die ghone
Die na hem heeren souden wesen,
Van allen costen, die si van desen
Crigen mochten, lude oft stille,
Om deser translacien wille,
Te bescudden, te hueden, eewelijc,
Ende quijt te houden paisselijc,
Jegen enen yegeliken,
Ghelijc dese pointen volcomeliken
Sijn begrepen in sconincs brieve,
Die hi daer af gaf met lieve,
Ende besegelde, als heere courtoys,
Te sente Quintijns, in Vermendoys
Ghegeven in Ons Heeren jaer
XIII^c XLVII, dats waer,
In de maent van junio
Ghescieden al dese dinc alsoe.
Dit achtervolgende eenpaerlijc,
Heeft van Vlaendren greve Lodewijc
Oec selve sijn brieve hier af gegeven,
In deser manieren in walsche gescreven,
Beghinnende aldus, doe ic u cont:
‘A tous ceaux qui ces présentes lettres verront.’