Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe greve Lodewijc van Vlaenderen doot bleef.

XXXI.

Int selve jaer, hoert wat ic sage,
In oeghst xxvj^sten daghe,
Street coninc Philips, si u verclaert,
Jegen den coninc Eduwaert
Van Ingelant, welcken strijt
Coninc Philips verloes tier tijt,
Van Vranckerike, die edel heere,
Dat hi wel mocht clagen seere;
Want van sier siden bleef daer doot
Menich edel heere groot.
Daer bleef verslagen die edel man
Van Beehem die blinde coninc Jan,
Die greve van Alensoen jammerlijc,
Des conincs broeder van Vranckrijc,
Ende die hertoghe van Lottringen,
Greve Lodewijc, verstaet die dingen,
Van Vlaenderen die edel heere,
Die greve van Bloys, ende veel meere
Grote andre edele heeren,
Die daer in den stride weren.