Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Dit is tverclaren op hertoghen Willems seggen voerscreven.

XIX.

Des anderen daghes, na dat
Grave Willem tot Aedt, in sijn stat;
Sijn seggen hadde ghepronunceert,
Soe wert dat seggen van hem vercleert
Tot Lessines in die stede,
Met openen brieven, die hi dede
Daeraf besegelen ende maken,
Daer in verclarende alle saken
Van donkerheide, soe hem dochte,
Die daerinne liggen mochte,
Ende sijn meininghe seide aldaer,
Op deen point voeren, ende op dander naer.
Op dierste, daer hi wel aen dede,
Daer hi uutsprac peis ende vrede,
Tusschen beide de heeren vort an,
Heeft hi verclaren daerop ghedaen
Dat alle hulpers ende hulperen
In den pays begrepen weren,
Wi si weren, van welcker partie,
In deen, of in die ander sie.
Op dander point doet hi verclaren
Dat die gene, die verdreven waren,
Comen souden elc opt sine;
Ende wes binnen den termine
Van den ghescillen waren opgheheven,
Ghequijt ochte ghegeven
In beiden siden, dat bleven quijt
Tot deser jegewordiger tijt.
Opt point als van der dienste vorseit
En heeft hi af noch toe gheleit
Dan dat die steden, alle viere,
Elc dienen souden met eenre baniere
Van haerre wapenen notabeliken,
Als dat int seggen claer mach bliken.
Item, op die verrechtinghe
Van den coste ende lastinghe,
Die grave Lodewijc hadde ghehat
In den orloghe, ende op dat
Seggen des conincs van Vranckerike
Tusschen den grave Lodewike,
Des Lodewijcs vader, ende vort an
Tusschen den derden hertoge Jan,
Als van lxxxvj^m ryale
Ende v^c, alsoe dat wale
Int seggen hier voeren is ghenareert,
Verclert hi, ende ordenert,
Op dat hi bevindt claerlijc
Dat sijne neve Lodewijc
Van der sommen voeren verhaelt
Volcomelec niet en es betaelt,
Dat hi hem in grave Lodewike
Daer in sal quiten trouwelike.
Item, ende op die bewisinghe
Van den tien dusent penninghe,
Die vrouwe Margriete hebben sal
Op Antwerpen, ende op al
Des daer ane cleeft ende toebehoort
Verclaert hi, ende gheloeft vort,
Dat hi sijnre nichten al
Die somme volvullen sal
Van tien dusent guldenen vorseit,
Jaerlics in erflicheit,
Op dat die renten van der stat
Van Antwerpen niet ende al
Verstringhen en mach, noch volplegen,
Sal hi ten naesten daer bi gheleghen
Bewisen in hoghen heerlicheiden,
Oft in renten enigherleiden,
Tot dat die somme erfelijc
Bewijst sal sijn volcomelijc.
Item, opt point van der stat
Van Antwerpen, dwelke dat
Haren rechten aen mach gaen,
Heeft hi verclaren daerop ghedaen,
Soe wes si over heeft ghegeven
Van privilegien bescreven,
Van chartren oft enighe vrihede
Quijt ghescouden, of verteghen mede,
Teghen wien het si, groot of smal,
Dat si des niet behouden en sal.
Item, opt point daer hi verclert
Dat der manscap aen toetchert,
Dat die grave Lodewijc
Manscap doen sal desghelijc
Den hertoghe ende der hertoghinne,
Als momboir sijnre gesellinne.
Item, opt point daer redenen sijn
Dat vrou Johanne noch Wencelijn
Becommeren, vercoepen, noch verbinden
Dlant van Brabant, te ghenen inden,
En souden moghen, van nu voert mere,
In al, in deele, in ghenen kere,
Daer en seit hi toe, meer noch min,
Dan alsoe tseggen houdet in.
Dits tverclaren dat hi dede
Te Lessines in die stede,
In junio den vijfsten dach,
Als men dusent gescreven sach
Drie hondert vijftich ende sevene.
Om der waerheit ghetughe te ghevene
Gaf hi brieve op dat verclaren,
Die met sinen seghele ghevesticht waren.