Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe hertoghe Wencelijn van Brabant ende grave Lodewijc van Vlaendren hen ghekeert hebben int seggen hertoghen Willems van Beyeren, sgreven van Henegouwe.

XVII.

Hertoghe Willem, si u bekant,
Van Beyeren, grave van Hollant,
Van Henegouwe, van Zeelant mede,
Ende Heere van Vriesen, die dede
Dedinghen tusscen die heeren beide
Met alsulken ondersceide,
Soe dats hen alle beide die heeren
In sijn seggen wouden keeren;
Want hi hen beiden na bestoet
Van maeghscapen, des sijt vroet,
Ende es der saken overcomen
Ende hevet te hemwert ghenomen
Van beide den heeren, groot ende smal,
Wes hi daeraf seggen sal
Dat dat ghehouden soude wesen,
In beiden siden, alsoe wijt lesen.
Als dit dus verre was bedreven
Worden hier brieven af ghegeven
Van submissien, van beide den heeren,
Daer si hem ganslec in keeren
In grave Willeme, sonder breken
Te houdene vast sijn uutspreken.
Dit geloefden die heeren beide,
Bi trouwen, eeren ende sekerheide,
Ende dadent oec, tot harer beden,
Den baenrotsen, edelen, ende steden
Met hen besegelen te hande,
Iegelijc in sinen lande,
Om dat te houden tallen tiden.
Hier met schieden in beiden siden
Die heeren van elc anderen daer.
Nu soe sal hier volgen naer
Tseggen dat grave Willem seide
Tusschen dese heeren beide,
In al der vormen, alsoe dat was
Uut ghesproken, alsoe ict las
Int walsche ghescreven die copie,
Van worde te worde, alsoe die
Besegelde brieve mensie maken,
Die tot Aedt van desen saken
Uut hangende besegelt waren,
Dwelck ic u bat sal verclaren,
Ende metter waerheit doen recort,
Hier naer, ter plaetsen daer behoert.
Al eest dat ic in rime sette
Dese uutsprake, elc lette
Daerop, dat si in walscher prose
Uut was ghesproken, maer sonder glose
Sal ic den text hier translateren
Uut walsche in dietsche, ende mijn begeren
Dat es der waerheit te volgen na,
Soe verre als ics mi versta,
Ende ic die waerheit van den dingen
Ten cortsen in rime can volbringen,
Ende ic ghedraeghs mi ten verclaren
Ten brieven dier af besegelt waren,
Ende ter correctien vort an
Van iegenliken goeden man.
Die een beter weet daertoe
Ter waerheit, ic bidde hem dat hijt doe.
Ende hier beginnic, ter Gods eeren,
Uut walsche in dietsche te translateren.