Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe de stede van Brabant tvoirscreven verbond gheloefden te houden.

XII.

Als al dese dinghen waren volgaen
Te Tricht, alzoe ghi hebt verstaen,
Hertoge Wencelijn ende vrou Johanne
Versochten al die goede manne
Van Brabant, aldaer ghedeputeert,
Met ernstegen versueke, ende met begert
Dat si dese dinghen besegelen wouden,
Ende onverbrekelec vortan houden;
Ende ten bevele ende ernsticheit
Des hertoghen ende hertoginne voerseit,
Ende bi goetduncken der edelre al,
Soe hebben die stede, groot ende smal
Van Brabant, alle samentlike,
Den keiser van den roemschen rike,
Hertoge Wenceline, ende vrou Johanne,
Bi trouwen geloeft, als goede mannen,
Bi der hulden die si hadden gedaen,
Ende sculdich waren, ende tasten aen
Des keisers hant, met ripen sinne,
Den hertoghe ende den hertoginne,
Dat si dese vorseide pointen al,
Ende elc van hen, houden sal
Voer hen, haer oer, haer erfgenamen,
Ende alle dien dat sal betamen,
Of in enegher wijs aen rueren,
Sullen vast houden ende volvueren,
Onverbrekelic, sonder begeven,
Soe verre als hen mach aen cleven,
Sonder ergenlist of malengien,
Ja, behoudelic allen dien
Chartren, privilegien, vriheden,
Rechten, costumen, die de vorleden
Keiseren, coningen, ende hertoghen
Den lande verleent hebben mogen
Van Brabant, of enegher stat
Besundere; ende van alle dat
Sijn brieven ghemaect ende ghescreven,
Onder die stede zegle ghegeven,
Des anderen daegs, des sijt ghewes,
Na date des briefs, die vorscreven es,
Van die hertoge Wencelijn
Ende vrou Johannen, der vrouwen sijn.
Dus sceit de keiser met minlichede,
Die hertoge ende vrou Johanne mede.