Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van den verbonde tusschen keiseren Karlen ende hertoghe Wenceline van Brabant, sinen broeder.

XI.

Als dus hertoghe Wencelijn
Beset hadde die palen sijn,
Tegen den grave Lodewike,
Besprac hi hem wiselike
Met sinen rade, ende heeft bedocht
Dat hi troest heeft ghesocht
Aen keiser Karlen, sinen broeder,
Den vierden Kaerle, die behoeder
Was van al den Roemscen rike:
Met hem wert eendrachtelike
Een dachvaert gheleest, in de stede
Van Trichte, daer vrou Johanne mede
Over was, na ende bi,
Ende daer soe overquamen si
Eens sekers verbonts, eer si scieden,
Dwelc dat ic u sal bedieden
Hier na, claerlijc, ongheloghen,
Uut der copien des briefs ghetogen,
Die rechte waerheit, den claren sin.
Primo was vorwarde int begin;
Dat die hertochdomme ende tlant
Van Limborch ende van Brabant
Bliven souden hertoghen Wenceline,
Ende Johanne, der vrouwen sine,
Als aen hunne natuerlike
Wettighe princen, desghelike,
Ende soude die selve Wencelijn
Vort ane ghebrukende sijn
Die hertoeghdomme, sonder scheiden,
Lande ende heerlicheiden,
Met al den toebehoorten, die si
Hadden, mogentlijc, los ende vri,
Als een waerachtich wettich heere,
Ende natuerlijc prince, ende meere
Sal hi beheeren ende regeren
Die leengoede, welc si weren,
Rechten, goeden, in al der manieren,
Gheven, leveren. Die officieren,
Met wat titele dat si
Ghenoemt worden, die sal hi
Setten ende ontsetten al,
Altijt alst hem ghenoegen sal;
Ghemeinlijc, los ende vri, volbringen,
Administreren in allen dingen,
Als waerachtege, erflike
Ende wittige ende natuerlike
Princen ende heeren plegen
Te administreren, sonder daer jegen
Iemants seggen te regeren.
Dit sal hi doen ende disponeren
Van al den vorscreven dade,
Bi wetene ende oec bi rade
Van vrou Johannen, in allen sinnen,
Sijnre liever ghesellinnen,
In sulker voegen, waert dat sake
Dat vrou Johanne wedersprake,
Ende consenteren niet en wilde
Die administratie, ende teghen hilde
Te volghene die dispositie sijn,
Soe soude hertoghe Wencelijn
Nochtans des hebben volcomen macht
Bi hem selve te sine volbracht
Alle die dingen, die voorscreven staen;
Ende wes dus bi hem worde gedaen,
Soude vort aen onverbreckelijc
Gehouden worden, behoudelijc
Dat die vorscreven heere Wencelijn,
Soe lange als die vrouwe sijn
Johanne leefde, sonder haren wille
Ende consent, lude noch stille,
Vercopen en soude noch aentasten,
Veranderen, vervremden, noch belasten
Negeensins die erflijcheit
Des hertoechdomme der heerlicheit,
Noch oec mede desghelike
Die goede onberuerlike.
Item, oft bi den Gods ghebiede
Vrouwe Johanne van der werelt sciede
Voer den hertoghe Wencelijn,
Sonder oer van den live sijn,
Soe soude Wencelijn succederen,
Entie hertoeghdomme regeren,
Die heerlicheiden entie landen,
Sonder iemans wederstanden,
Als een natuerlec prince ende heer.
Item, oft hertoghe Wencelijn eere
Storve dan vrou Johanne en dede,
Sonder oer, als ic voer sede,
Te latene van sinen live,
Es vorwarde dat si dan blive,
Vrou Johanne, al haer leven,
Prince ende vrouwe der lande vorscreven.
Item, oft ghebeurde tsine,
Dat na die doot van Wenceline
Vrou Johanne van enegen anderen man
Wettich oer creghe, dat die dan
Na haer doot selen succederen
Int hertoeghdomme, ende regeren
Die lande, entie heerlicheiden.
Item, of si beide verscheiden
Sonder oer van haren liven,
Soe soude die hertoeghdomme bliven,
Die lande, ende die heerlicheide,
Van Brabant ende van Limborch beide,
Op keiser Karlen, sonder rigeur,
Als op den wittegen successeur;
Ende of keiser Karle alsdan
Niet en leefde, soe soude vort an
Die lande, daer wi nu af scriven,
Op den naestlevenden bliven,
In regemente ende in besorch
Der gheborten van Lutzenborch.
Item, noch vorwaerden sijn
Dat vrou Johanne ende Wencelijn
Noch die lande, die ic voersede,
Van Brabant ende van Limborch mede,
Met haren vianden in genen sake
Pays noch bestant en sullen maken,
Sonder consent ende eendrachticheit
Karlen, des keisers vorseit,
Ende des gelike soe en sal
Die keiser aengaen, groot noch smal,
Met den vianden voreghenant
Pays maken noch bestant,
Sonder den wille van Wenceline,
Des lants, ende der vrouwen sine.
Item, alle dese poente vorseit
Gheschieden bi wille ende wetentheit,
Bi vrien consente openbaer
Van vrou Johanne, die aldaer
Gheloefde dese vorseide dingen
Onverbrekelec te volbringen,
Ende sonder ergenlist the houwen
Vast ende ghestade, in goeder trouwen.
Ende hieraf worden bescreven
Die brieve, gesegelt ende ghegeven
Te Brussel in Ons Heren jaer
XIII^c ses ende vijftich, naer
Die costume blikelike
Van den sticht van Camerike,
Des maendaegs voer, dat ghijt wit,
Als men singt invocavit.