Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe die derde hertoge Jan sijn drie soenen bestaetde.

III.

Nu willic u int corte verclaren
Hoe hertoge Jan, die edelbaren,
Die van doeghden was soe rike,
Sijn kinder stelde te huwelike.
Al eest dat ghijt hebt mogen horen
In den V^en boec hier voren,
Alsoet bescreven es al daer;
Maer om te bat te doen verclaer,
Ende te bliven in u memorie
Dese na volgende istorie,
Van grade te grade, alsoet behoert,
Soe doe ics u alhier recort,
Op dat ghijs sijt te bat te binnen.
Die outste sone, wilt versinnen,
Die Jan bi namen was gheheten,
Na den vader, dat suldi weten,
Dede huwelijc herde rike
Aen sconincs dochter van Vrancrike:
Coninc Philips hiet die gone.
Ende Heinricke, den middelsten sone,
Wert gegeven te huwelike
Heren Jans dochter van Vrancrike,
Coninc Philips sone dies heren,
Die hi troude met groter eeren.
Den joncsten sone Godevert
Wort ghegeven een vrouwe wert,
Scoen ende hovesch in al haer doen,
Des hertogen dochter van Bourboen,
Een machtich here ende een rike:
Dus waren si in Vrancrike,
Dese drie sonen, daer ic af spreke,
Alle ghestelt te huweleke.