Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe de derde hertoghe Jan sijn drie dochteren bestaetde.

IV.

Nu willic u vort doen bekant
Hoe die dochteren van Brabant,
Johanne, Margriete ende Marie,
Bestaedt worden alle drie,
Te huwelike met groter eeren,
Aen mechtighe vermogende heeren,
Die omtrent Brabant waren geseten,
Alle drie, dat suldi weten.
Der outster dochter, die hiet Johanne,
Ghegeven soe wort hare te manne
Grave Willemme van Hollant,
Van Henegouwe ende van Zeelant;
Margriete wort te huwelike
Ghegeven grave Lodewike,
Van Vlaenderen den mogenden here,
Die na de doot van sinen zwere
Brabant orloeghde, entie sine,
Op den hertoge Wenceline.
Die joncste dochter, vrou Marie,
Nam te manne, bi svader tide,
Van Gelder den hertoghe Reinoute.
Dus bestaedde die wise, die stoute,
Die derde Jan, dus hoechelike,
Sijn drie sonen in Vrancrike,
Dat keiser, coninc, noch ander heeren
Qualic hadden met meerder eeren
Mogen bestaden, of alsoe scone,
Haer kinder, als aen die vranxsche crone,
Die edelste van kerstenrike.
Dus hoghe ende dus notabelike
Bestaedde die hoghe geborne man
Sijn III sonen, ende vort an,
Daer hem groot wijsheit toe beruerde.
Hi sijn goede lant ommuerde
Met sinen III dochteren avenant,
Met Gelre, Vlaenderen, ende Hollant,
Dien hise te huwelic heeft gegeven,
Om dat hi wilde met rusten leven
Ende sijn ondersaten bevreden,
Sijn borge, sijn lande, ende sinen steden
Te houden in vreden ende in rusten.
Aldus mocht iegeliken lusten
Te sine onder hem gheseten.
Ende tusscen alle (suldi weten)
Dese huwelike, dat elc verstae,
Was die maegscap alsoe nae,
Dat die VI^e paus Clement
Moest daer in dragen sijn consent,
Ende dispenseren daer mede;
Want na der heiliger kerken sede
En hadt niet anders mogen gescien;
Maer ghemerct ende oversien
Van den paus, onsen heilegen vader,
Die nutscap die altegader
Aen dese huwelike was gelegen,
Wort sijn consent daer toe gedregen,
Om te sterckene kerstenhede,
Ende om te vuedene pais ende vrede
Tusscen die lande al te samen,
Die ic vore hebbe genoemt met namen.
Ten nes geen noot dat ict verhale.
Nu mercke een iegelic hoe wale
Dat hertoge Jan als een heere
Sijn lant hilt in groter eere,
Ende sijn kinder soe heerlike
Bracht te soe groten huwelike,
Binnen sinen levenden live,
Des billic manne ende wive
Hem des sullen spreken eere.
Nu dunct mi tijt dat ic u leere
Te weten die istorien vort,
Die ghi noch niet en hebt gehoert,