Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van huwelike der kindren shertoghen.

57.

Doen Eduwaert lach in Brabant,
Als ic vore dede becant,
Waert ghemaect eene vorwaerde
Tusschen den hertoghe ende Eduwaerde,
Als dat shertoghen dochter scone
Soude hebben Eduwaerts sone,
Ende om dat si na maghe waren,
Soe gheloofde Eduwaert twaren
Dat hi, binnen den coste sijn,
Binnen sekeren termijn
An den paus soude impetreren,
Dat hier mede soude dispenseren;
Ende, overlede den termijn,
Soe soude die vorwaerde niet sijn.
Eduwaert sende, dat es waer,
Sijn eersame bode hier naer
Toten paus tAvengoen,
Maer die paus en wouts niet doen,
Watmen aen hem sochte doen;
Want Philips wout alsoe.
Aldus, als ghi na hier siet,
Soe bleef dat huwelic niet.
Aldus benam sekerlike
Coninc Philips van Vrancrike
Dat die hertoghe, hier noch ghinder,
Bestaen en const sijn kinder;
Want hi en constese nerghen bestaden
Eersamelic aen haer gaden,
Die paus en hadde, dat ghijt wet,
Moeten dispenseren daer met,
Ende Philips hielt die paus in dien
Dat hijt nerghens en liet ghescien,
Daer hem enichsins dochte
Dat hem onstade doen mochte,
Soe dat men duchte dat van desen
Brabant sonder oir soude wesen.
Doen die hertoghe sach al bloet
Dat sijn kinder werden groot,
Ende het al aen Philipse stoet,
Liet hi sincken sinen moet,
Die hi droech te Philips waert,
Die hem dicke hadde ghedaert,
Alsoe dat hi sijn kinder bestade
Een deel alsoet Philips gaedde.
Sinen outsten sone Heinrike
Bestaedde hi in Vrancrike,
Aen heer Jans dochter, sijt seker das,
Die Philips outste sone was,
Mer si en was noch, te waren,
Out meer dan van vijf jaren,
Die van vader ende van moeder bede
Bestonden ten derden lede.
Godevaert, sinen joncsten sone,
Bestaedde hi in Borboen,
An des hertoghen dochter dare.
Dat ic u segghe dats ware.
Joncfrouwe Margriete, die dochter sijn,
Die scone was ende van doechden fijn,
Gaf hi van Vlaendren den grave,
Daer ic u hier voer seide ave.
Sijnre joncster dochter Marien,
Daermen alle goet af mach lien,
Gafmen, als ic u toeghe,
Van Ghelren den hertoghe,
Die alsoe ontreet sinen oem,
Als ic u vore dede goem.
Ende al dese waren
Na ghemaghe twaren;
Nochtan dispenseerde daer met
Die seste Clement, dat wet,
Alsoet doen Philips begeerde,
Wiens wille hi niet en weerde.
Sijn outste dochter Johanne
Was voer comen te manne,
Aen den grave van Hollant,
Die doot bleef in der Vriesen lant:
Scoene was hi ende wel gheraect
Ende van doechden wel volmaect.
Gheen kint en liet hi van hare:
Dat was Brabant sere contrare.