Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van twee huweliken die ghemaect waren vore Kaleys.

55.

Nu doen Eduwaert voer Kaleys lach,
Als ic u voren dede ghewach,
Soe maecte hi twee huwelike:
Deene was van Lodewike,
Die grave van Vlaendren was dan;
Daer woude hi sijnre dochter brenghen an,
Wies vader Eduwaert met ghewelt
Versloech te Cressi op dat velt.
Des graven moeder ende vader
Woenden in Vrancrike beide gader,
Ende hadden Vlaendren geruumt beide,
Om haers volcs ombescheidenheide.
Doen de grave vernam die mare
Dat sijn vader ende moeder doot ware,
Quam hi saen in Vlaendrenlant,
Om te proevene of hem te hant
Iet te bat soude moghen gaen,
Dant sinen vader had ghedaen;
Doch wart hi ontfaen voer here;
Maer in alsulken kere,
Als si sinen vader hilden
Si desen oec houden wilden.
Hi moest singhen alsulken sanc
Als si wilden, wast cort of lanc.
Int leste si hem vore leiden
Dat hi moeste, sonder beiden,
Eduwaerts dochter sonder waen
Tot enen wive ontfaen,
Ende dat dat emmer moeste wesen.
Die grave antwoerde te desen
Vele redenen scoene ende goede,
Ende dat hem dat niet te doen en stoede;
Want die coninc in corten daghen
Sinen vader hadde verslaghen,
Ende dat hi oec niet en ware soe coene
Eneghen huwelic te doene
Buten moeder ende vrienden rade,
Ende dat hijs emmer niet en dade.
Dit en bescoet cort noch lanc,
Si namene ieghen sinen danc,
Ende voerdene, metter vaert,
Vore Kaleys tot Eduwaert,
Ende deden hem die joncfrouwe
Sijns ondancs doen ondertrouwe;
Ende daer na al te hant
Keerde hi in Vlaenderlant,
Al of hi woude bereiden
Sijnre bruloft bescheiden,
Ende is al heimelike
Ontreden in Vrancrike,
Ende vertrac sinen maghen, twaren,
Hoe hi hadde ghevaren.
Hier na suldi verstaen
Hoe hi huwelic heeft ghedaen
Aen tshertoghen dochter van Brabant,
Alsoe als mi es becant.