Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe die stat van Hoy viel aen den herthoghe.

52.

Hier na, int ander jaer,
Quam die stad van Hoy voerwaer
Ane den hertoghe van Brabant,
Ende dede hem aldus bekant,
Dat si an hem vallen wilde
In dien dat hise te rechte hilde,
Ieghen horen here den bisscop,
Die hem dicke liepe op,
Ende bescatte ende versloech,
Meer dant was int ghevoech.
Die hertoghe dachte, in sinen moet,
Dat die bisscop sinen overmoet
Dicken te hem waert hadde ghekeert,
Ende dat hien dicke hadde onteert,
Hadde hijt moghen brenghen toe.
Die hertoghe ontfincse doe,
Ende si setten in sien hant
Beide stat, borch ende lant;
Ende die hertoghe, sonder beiden,
Deedse weder thuus leiden
Met ghewapender hant, ende na dat
Soe besette hi borch ende stat
Metten ghenen die hi begheerde,
Datten bisscop int herte deerde.
Die hertoghe dede clocken slaen
Ende orloghe ghebieden saen;
Die bisscop weder alsoe.
Int leste bracht daer toe
Van Henegouwen die grave,
Dat men maecte hier ave
Te Leuwe ene dachvaert,
Daert tperlament viel wel haert;
Want der claghen, tien tiden,
Vele waren in elke side.
Int leste soe bleef die twist
Sonder orloghe al ghechist.