Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe Eduwaert die scepe versloech int Swin.

50.

Nu es comen Eduwaert
Over die zee, metter vaert,
Met een deel groter scepen,
Ende heeft dat Swin begrepen,
Daer hi drie hondert scepe vant,
Die Philips daer hadde ghesant,
Die op die zee, weder ende voert,
Meneghen roef daden ende moert,
Ende alsoe verleeght hadden tSwin,
Datter gheen goet mochte in,
Des grote breke hadde Vlaenderlant,
Ende oec Zeelant ende Brabant.
Desen scepen soe bestoet
Coninc Eduwaert metter spoet,
Met enen sterken toeganghe,
Ende street met hen soe langhe
Dat hise int leste verwan.
Der Franchoise bleven daer dan
Dertich dusent (dat was groot);
Die zee was van bloede root;
In menich scip men woet
Toten enkele in dat bloet.
Dit ghesciede, dat si u cont,
Op Sinte Jans Baptisten avont,
Ende oec opten dach daerna,
Doe men screef, als ict versta,
Dusentich ende driehondert
Ende veertich, wien so es wondert.