Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Van den verbonde dat Vlaendren, Brabant ende Henegouwe te samen maecten.

49.

Nu wart binnen Ghent verhaven
Een knape, niet rike van haven,
Van gheenre groter gheboert,
Die soe wart ghetoghen voert,
Dat al dlant ane hem vel.
Spreken consti harde wel
Ende wart van groten ghewelde,
Ende hiet Jacob van Artevelde,
Daer al dlant an viel sere
Ieghen den grave sinen here:
Dese Jacob bracht daer toe
Dat verbonden worden doe
Eduwaert, coninc van Engelant,
Ende Vlaendren ende Brabant,
Ende die grave van Hollant mede,
Met consent van elker stede,
Ende dat vaste bechartereert,
Ende met zeghelen gheconfirmeert,
Dat elc soude anderen wale
Helpen houden sine pale,
Ieghen elc lant ende elken here,
Ende dit soude dueren emmermere.
Coninc Eduwaert, na desen doene,
Trac van Antwerpen metter woene
Al te Ghent in die stede,
Sijn wijf ende kindere mede,
Ende van daer trac hi te hant
Over in Enghelant;
Maer hi gheloefde, in desen,
Dat hi in Vlaendren soude wesen
Tusschen dan en sinte Jans daghe,
Die in den midden somer ghelaghe,
Ende daer op soe liet hi ghinder
Sijn vrouwe ende oec sijn kinder.
Te naesten Sinxenen, al te hant,
Trac die hertoghe van Brabant
Voer Tuunliveke, bi Camerike,
Met sijnre ghemeente moghentlike,
Om van Hollant sgraven bede,
Daer omme dat hijt gherne dede;
Want van Vrancrike mijn heer Jan
Was comen daer met meneghen man,
Om dat hi dat huus woude winnen,
Ende verslaen diere waren binnen;
Want die grave, dat ghijt wet,
Hadt van sijn hant beset,
Al en hordet hem niet toe.
Dit woude heer Jan wreken doe;
Maer doen hi sach an
Int dander side soe meneghen man,
Onder Vlaminghe ende Brabantsoene,
Ende Heinewiere vroem ende coene,
Hilt hi hem daer over enen pas,
Daer hi wel mede bewaert was.
Doen dit marcte die grave,
Dedi sijn lieden comen ave,
Ende stac int huus den brant ter vaert.
Doen keerden si alle thuus waert.