Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe Eduwaert hulpe sochte aen den hertoghe van Brabant.

47.

Nu, alse Eduwaert heeft vernomen
Dat die keiser niet en sal comen,
Es hi ghetoghen al te hant
An den hertoghe van Brabant,
Die sijnre moyen sone was,
Ende versochte ane hem das,
Van srijcs weghen, dat hi
Met rechte hem soude staen bi,
Ende donrecht helpen wederstaen,
Dat Philips hadde ghedaen
Ende sijn vorderen den keiserrike,
Ende sonderlinghe an Camerike,
Dat hi aen hem hadde ghesaect,
Ende sijn slot daer af ghemaect,
Dat den rike behoert toe.
Oec vermaendijs hem doe
Van maechscape, dat hi
Hem hulpe ende stoede bi
Donrecht keren ende scade,
Die hem Philips van Valoes dade,
Ende des en woude bekennen niet.
Die hertoghe hem doe beriet,
Ende wart des te rade dan,
Want hi ware des rijcx man,
Dat hi ente sine souden
Sriken palen helpen houden,
Na dien dat hijs openbare
Van scrijcs weghen versocht ware.
Oec ghedachte den hertoghe mede
Die grote scade ende onrede,
Die hem Philips, al sonder waen,
Daer te voren hadde ghedaen,
Doe hi met sinen goude roet
Ghewan xvi lantsheren groet,
Om dat si Brabant souden ontghinnen,
Enten hertoghe sijn lant af winnen,
Ende dan hem brenghen ghevaen,
Daer elc van hem, sonder waen,
Al sine macht dede toe,
Des hi met eren ontstoet doe,
Des men ewelike wel mach
Met rechte doen ghewach.
Daer af dat u die waerheit
Hier vore al af es gheseit.
Dus gherees soe lanc die dinc,
Dat die somer sere henen ghinc.
Doe nam die coninc sine vaert
Uut Brabant te Vrancrike waert,
Omtrent onser Vrouwen dach,
Die in Septembre ghelach,
Doer Henegouwe ende Camercijs.
Die hertoghe, in deser wijs,
Gherede hem oec hier ieghen,
Als die sijnre manscap woude pleghen,
Met vele heren, des sijt vroet,
Daer hi hem eerlic mede loet,
Alse graven ende baenrossen, twaren,
Die met hem onthouden waren.
Die hertoghe van Ghelre quamer toe
Ende twee marcgraven alsoe,
Gulcke ende Brandenborch, dat wet,
Loen, Marke ende Verrenborch met,
Van Catsenhelleboghe die grave,
Ende van den Berghe: dese quamen ave.
Die grave van Mijssen quamer toe,
Die here van Valkenborch alsoe,
Mijn heer Jan van Henegouwe,
Die here van Kuuc, als ict scouwe,
Ende ander heren, die ic u
Niet en can ghenoemen nu,
Die alle quamen willichlike
Op Philipse van Vrancrike.
Die bisscop van Ludeke dan,
Ende van Bemen coninc Jan,
Ende van Henegouwe die grave
(Philips wasser oem ave):
Dese trocken waerlike
Met Philipse in Vrancrike.
Al was die grave van Henegouwe
Over ghetoghen, als ict scouwe,
Met Philipse sinen oeme,
Hi en wasser niet seer wellecome;
Want Eduwaert, als ic u scrive,
Hadde sijnre suster tenen wive,
Soe dat Philips wel verstoet
Dat sijn neve droech den moet
Vele meer tote Eduwaerde,
Alsoe hi sint wel openbaerde.