Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Hoe die grave van Baren Edewaert quam hertoghe Jan te hulpe.

33.

Grave Eduwaert van Baren
Liet nu al gader varen
Den evelen moet ende den toren,
Dien hi ghehat hadde te voren
Opten hertoghe, alse ghi
Te voren horet seggen mi.
Doen hi wiste ende vernam bloot,
Dat sijn neve was in der noot,
Quam hi hem vromelic te baten
Wel met driehondert platen,
Ende ghetroeste hem al der viande
Dier tusschen saten in den lande,
Dore der welker lande hi toech
Openbare, met moede hoech,
Ende diende den hertoghe scone;
Want het was sijnre moyen sone.
Doen die hertoghe dat vernam,
Dat die grave tote hem quam,
Es hi met eenre scaren
Eerlike ieghen hem ghevaren.
Ende brachtene te Brusele in die stede,
Daer hi hem grote ere dede;
Ende om dat die hertoghe woude
Dat hi te ghemake sijn soude,
Ende die ghene die tote hem hoerden,
Soe bewijsde hi hem Vilvoerden,
Om dat hi, ten selven tiden,
Ute ende in soude riden;
Oec waest Brusele bi ghenoech,
Ende hi vant daer sijn ghevoech
Van voeragien ende anderen dinghen.
Nu hoert hoe sijt voert ane ghinghen.