Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Des anders Jans zeden ende sine doot.

Dat VIII Capittel.

Dese andre Jan hertoghe
Dede huwelic groot ende hoghe;
Want hi nam te wive
Margrieten, scone van live,
Des conincs dochter van Enghelant
(Die goede Edewaert was hi ghenant):
Hier ane soe wan hi enen sone,
Jan soe hiet oec die gone.
Dese ander Jan was een ridder stout,
Ende sterf van daghen niet out,
Scone, gracieus ende wel ghemaect,
Ende van facunden wel gheraect,
Soete van sinne ende sonder nijt:
Hi lach langhen tijt
Voer Wassenberghe met sinen here,
Dat hi na sinen ghere
Ghewan al metten lande,
Ende noch hebben in die hande.
Al was sijn vader vrome becant
Nochtan was dese in Overlant
Vorder dan sijn vader was,
Met here crachte, gheloeft mi das;
Want voer Rijclijchusen voer hi,
Daer hi langhe lach bi,
Ondancs alle dien heren
Diene ondertusschen mochten keren,
Daer hi sinen wille af gewan.
Dien hertoghe nochtan
En was dorloghe sine niet;
Maer, soe hem sijn raet riet,
Halp hi vander Marken den grave,
Die men tsine woude breken ave.
Hi wan oec in sinen tide
Sente Ghertruenberghe met stride.
Hoe hi oec met cleinre macht
Te Vilvoerden ende te Genepien vacht,
Dat hebdi hier voren ghehoert,
Daert te stane behoert.
Hi street node, als ict vernam;
Maer als hi te velde quam
Was hi coene, dat verstaet,
Ende toende soe hoech ghelaet,
Dat al tvolc van kerstenhede
Vercoenen mochte daer mede.
Tervuren sterf hi in sine zale,
Als hi hertoghe bi ghetale
Hadde gheweest xix jaer,
Doe men screef openbaer
Dusent ende hondertwerve drie
Ende twelve, gheloeves mie,
Ende wart te Brusele begraven
Te Sente Gudelen, met groter haven;
Ende int naeste jaer daer na
Soe sterf die keiser, als ict versta,
Van Lutsenborch Heinrijc,
Diet al wan vromelijc
Metten sweerde, tot Romen toe.
Oec woude men segghen doe,
Dat hi vergheven was, in ware dinc,
Daer hi Gods lichame onfinc,
Te half hoegste, op Onser Vrouwen dach,
Dies men ewelic ghedencken mach.
Ende doen hi voer te Rome waert
Starf oec, in die vaert,
Sijn wijf, die dochter was
Des goets Jans, daer ic af las,
Die des keisers vader met ghewelt
Versloech te Woeronc opt velt.