Brabantsche yeesten. Les gestes des ducs-de-Brabant par Jean de Klerk d'Anvers (3 delen)

Vyfde boek.

Dat vijfste boec beghint hier nu,
Daer ic in sal segghen u
Hoe si, met ghewelt ende vermoghen,
Sitten drievoldighe hertoghen
Van Brabant ende van Lothrike,
Ende van Limborch die ghelike,
Dat die eerste hertoghe Jan
Vromelic metten swaerde wan,
Alsoe ic u hier voren screef,
Ende hoe hi met onghevalle doot bleef,
Ende oec van wondre ende van plaghen,
Die doe ghevielen in sinen daghen,
Die meeste, dat weet te waren,
Die ghevielen in dusent jaren.
Dese boec hevet in
Elf Capittele, meer noch min.