Sommighe Daghelicsche Ghebeden
(1595)–Pieter de Bisschop–
Auteursrechtvrij
[Folio A2v]
| |
Op de wijse vanden xvj. Psal.
O Eeuwich Godt, schijnende licht zeer klaer,
Ghy verdrijft de Nacht der sonden, waer-inne
Alle blintheyt des herten is zeer swaer:
Ghy hebt den Nacht verordent van beghinne
Om te rusten (also men wel kan mercken)
Als den dach om t’arbeyden end’ te wercken.
Wy bidden v dat ons lichamen fijn
In vreed’ moghen rusten na v behaghen,
Op dat sy daer na bequaem moghen zijn
Te lijden den last die sy moeten draghen.
Maticht onsen slaep, op dat wy mits desen
Onbevlect aen ziel end’ lijf moghen wesen.
Op dat onsen slaep t’uwer eer gheschiet,
Verlicht d’ooghen onses verstants inwendich:
Op dat wy inden Doot ontslapen niet,
Maer verwachten moghen altijt bestendich
Ons verlossingh’ wt dees ellendicheden,
Daer met wy zijn beladen hier beneden.
Beschermt ons ooc voor alle listicheyt
End’ aenvechtingh’ des Duyvels vol onvreden,
Ons nemende in v heylich gheleydt,
Want wy en hebben desen dach voorleden
Eylaes niet door-ghebracht, zonder O Heere
Teghen v te hebben ghesondicht zeere.
Hieromme zoo bidden wy v altsaem,
Wilt bedecken ons zonden vol onweerden
Door uwe barmherticheyt zeer bequaem,
Ghelijc ghy nu alle dinc hebt op eerden
Bedect: op dat wy van v aenschijn goedich,
Daeromme niet worden verstooten spoedich.
Gheeft ooc ruste, troost end’ verquickingh’ zoet
Allen krancken ende bedroefden herten,
Ooc al die zijn beswaert in haer ghemoet,
End’ bevanghen met veel pijnen end’ smerten:
Door Jesum Christum des droefheyts ontlader,
Die ons heeft leeren bidden Onse-Vader.
|
|