Sommighe Daghelicsche Ghebeden
(1595)–Pieter de Bisschop–
Auteursrechtvrij
[Folio A2r]
| |
op de vvijse des Cxix. Psal.
O Hemelsche Vader van grooter macht,
Wy dancken dy end’ uwen Lof verklaren,
Dat ghy voor ons ghewaect hebt desen Nacht,
Wy bidden dij, sterct ons uwe Dienaren,
Met uwen Gheest, die ons [met] syne kracht
Wil allesins gheleyden ende [bew]aren.
Dat wy desen Dagh (bidden wy o HEER)
End’ al den tijdt ons levens hier op eerden
Besteden tot heylicheyt meer end’ meer,
End’ ooc al wat wy ten handen aenveerden
Doch altijt sien, te verbreyden veer,
Verwachtende dynen zeghen vol weerden.
Op dat wy van v verkrijghen ghewis,
Sulcke groote ghenade t’aller stonde,
Wilt volghende dyne beloftenis,
Ons vergheven al ons misdaet end’ sonde,
Door tbloet dijns Soons, twelcke den middel is,
Want sy zijn ons zeer leet van herten gronde:
Ons herten: HEER verlicht door uwen Gheest,
Dat wy alle wercken der duysterheden
Aflegghende wandelen minst en d’meest
Als kinderen des lichts altijt in vreden,
In nieuwicheyt des levens onbevreest,
In heylicheyt ende Godsalicheden.
Gheeft ooc dat over al v heylich woort,
Door uwen zeghen mach vercondicht wesen,
Alle wercken des Duyvels gantsch verstoort.
Sterct alle Kercken-dienaers wtghelesen,
End d’Overheyt ws volcx met goet accoort,
Dat uwen Naem over al zij ghepresen.
Vertroost alle benaude herten swaer,
Die tot v vlien en wiltje niet beschamen:
End’ alle die in lijden zijn end’ vaer
Wiltse o Godt verstercken al te samen,
Met uwen Gheest onsen Trooster voorwaer,
Door onsen Heere Jesum Christum, AMEN.
|
|