my willen impugneren segghende dat in dese verwonderinghe de Const gheleghen is en door dese verwonderingh den Mensch overwonnen wordt te moeten ghelooven dat de Schildry constigher is als het Beldthouwen, want t'ghene den mensch van alle canten siet, tast, en ghevoelt, soo seer niet en doet verwonderen oft ghelooven als t'ghene hy siet en meynt te sijn d'welck soo niet en is, maer alsoo dit argument bestaet in enckel schijn, welcken schijn baert een gheloof aenden mensch welck gheloof ten opsicht van een volmaeckt ghesneden Beldt onnoodich is, door dien niemant en moet ghelooven dat hy can sien en inder daedt tast en ghevoelt.
Qui videt & sentit quod credit esse non judiget fide.
Die met de handen voelt t'gen hy voor ooghen siet
Besonderlijck Sculptuer die en ghelooft haer niet
Maer die voor hem siet staen Picturas ghesteltenis
Ghelooft t'gen inder daedt (als 't blijckt) soo niet en is.
Den fraey versierenden Poeet Ovidivs en maeckt in gheen van alle sijn Fabel-boecken kenbaer dat oyt eenighe schildry besielt is met het leven ghelijck hy wel waer maeckt volghens sijn schrijven, vande schoone Pandora die Vulcanus door het ghebodt van Jupiter den oppersten Godt des Hemels ghemaekt hadde van rouwe pot-aerde. Redenen sijn dese dat Pictura zijnde in haer selven niet meer als een schaduwe ende onghevoelijck, niet en can besielt worden ghelijck een ghesneden Statuwe die van alle kanten haer ghevoelen heeft. Dese potaerde Pandora viel inde ooghen van alle de Goden soo aenghenaem dat sy besielt ende met alle gaven van deught en ondeught verciert werdt, en werdt ghenoemt Pandora d'welck te segghen is Gaef van alle Goden. Pictura sal hier teghen misschien willen argueren en segghen dat dese Pandora oft Goden gaeff door haer onghehoorsaemheyt de wereldt brocht in d'uyterste quellingh en benauwtheyt als sy de doos (waer in deughden en ondeughden besloten waren) teghen het verbodt van Jupiter gheopent hadde, sulckx datter niet meer in en bleef als de hope, concluderende oft besluytende de voorsz. Pictura hier mede dat Pictura noyt in soo quaden reputatie en haetelijcken naem by de Goden is gheweest als Sculptura die besloten was in Pandora, waer op jemandt sou moghen antwoorden dat om dit ghebreck de volmaecktheyt vande Konst niet te verlegghen en is (waer over hier maer ghedisputeert en wordt, want Eva ons eerste Moeder heeft noyt jemandt haers ghelijck ghehadt in schoonheydt en volmaecktheyt, die nochtans teghen de ghehoorsaemheyt en boven Godts ghebodt door t'appel byten alle menschen heeft ghebrocht in alle miserien, die niet eyndighen en sullen voor dat wy ons levens eyndt hebben af-ghesponnen anders niet behoudende als een goede hope van zalich te worden, soo wanneer wy Godts gheboden onderhouden, ons wachtende van sonden ende naer de leeringh vande Heylighe Roomsche Catholicque Kercke ghelooven. Waer mede my dunckt ghenochsaem gheseyt te hebben, het restant om cortheyt wille achterlatende, dus wil ick wederom eens daelen op den Lof die de naervolghende Plaedt-snijders door haer Konst verdienen ende in het Boeck vande onsterffelijcke Faem gheschreven worden.
Auteursrechtvrij