Cornelis Cort
Constich plaedt-snijder van Horne in Hollandt, gheboren in't jaer 1536. ende ghestorven anno 1578.
DEsen Cornelis Cort is gheweest een fraey Plaedt-snijder gheboren tot Horne in Hollandt, den welcken langhe jaeren ghewoont heeft in Jtalien, ende om den lossen en cloecken aerdt die hy met het Graveer-yser op copere en houte Platen wist uyt te drucken, is dickwils gheemployeert gheweest van Raphael Urbien waer voor dat hy menichvuldighe Platen ghesneden heeft, oock voor den vermaerden en hooch-gheachten Titiaen, en meer ander de welcke by alle Lief-hebbers van Papiere-const in groote weerden worden ghehouden. Js binnen Roomen ghestorven in't jaer ghelijck voorszeit is. Reden dan dat ick niet en heb connen laeten boven t'ghene voorschreven is te segghen:
De vaste Teecken-const Picturas Voester is
Het eenich fondament van haer ghesteltenis,
Want schoon Pictura leeft door alderhande verven
Die door de Teecken-const, de tweede eer beerven
Waermed' dat sy schildry seer wesentlijck verschoont
En door de ware Kunst schier d'eyghen leven thoont,
Nochtans moet jeder een belijden naer de reden
Dat al hun malsicheyt en wonder lossicheden
Bestaen in Teeckeningh die ziel is van Pictuer
Den grondt-steen vanden gheest, oft af-beldt van Natuer,
Soo als Cornelis Cort heeft menichmael bewesen
Aen Raphael d'Vrbien en Titiaen voor desen,
Daer hy soo menich plaedt heeft aerdich voor gheetst
Ghesneden en ghestipt, naer t'gen' eerst was gheschetst
Oft van hun cloecke handt gheteeckent naer het leven
Waer voor men heden-daeghs siet grooten rijckdom gheven.
Want schoon den omtreck van het levens schijn haer draeght
Ghelijck een swerte schaey, nochtans haer Const behaeght.
Auteursrechtvrij
