Het gulden cabinet van de edel vry schilderconst

(1662)–Cornelis de Bie– rechtenstatus



[pagina 393]
Peeter de VVit Landtschap-schilder van Antwepen. SOo maer des winters daeghs t'ghevoghelt sach de stucken Gheschildert van de VVit die het gheboompt uyt drucken De Konst sou hunnen aert ontsteken met jolijt Soo als in't midden van den heeten Somers-tijt. Den soeten Nachtegael sou nieu ghenuchten scheppen Den Oyevaer waer oock terstont weer aen het cleppen De Lijster aen t'ghefluyt en t'Quackeltjen aen t'slaen De Musch aen t'nestelen, en t'Krekeltjen aen t'gaen, Soo levendich door Konst can ons de VVit doen blijcken De groene boomen die het leven niet en wijcken Soo aenghenaem thoont hy de ooghen hun vermaeck Dat hy die licht verweckt uyt eenen swaeren vaeck. Als maer sijn cloecke handt een Landtschap gaet bereyen Dat menich Kenders oogh door lusten can verleyen Soo liefelijck verschiet t'asurich achter-werck Tot welstandt vande Const, soo crachtich cloek en sterck Den voorgront uyt ghehaelt, dat gheen bosch oft waranden Gheen weghen wel beplant schoon en vruchtbaer landen En sijn in't leven soo plaisant naer d'oogh ghestelt Oft worden door de VVit verthoont en afghebelt.