Het gulden cabinet van de edel vry schilderconst

La Hiere
Schilder van Parijs, in Figuren en Landtschap.

HIer blindt-doeckt d'eel Pictuer (al die haer Const bestrijen)

Met schaem-root, en s'ontdeckt hun botheyt altemael,

Midts sonder kennis niemandt haeten mach schildrijen

Oft t'oordeel datmen gheeft, is vol van leughentael.

Want alsmen siet het werck van de La Hiers Pinceelen

Soo rijck van Const als gheest, om haere seldsaemheyt,

Soo schijnt dat haere kracht een jeders lust sal steelen

Die gheenen loon verwacht als de onsterff'lijckheyt.