Het gulden cabinet van de edel vry schilderconst

[p. 296]

Andreas Sack
Figuer-schilder tot Roomen.

PIctuer die wort ghenaempt de schoonste Constens bloem
Des Schilders hoochste eer en hertens glori roem.

Mach wel met d'eelheyts glans en luyster sijn beperelt

Midts sy alleen is de croon-voerster vande werelt.

Want aenghesien den mensch (gheschapen naer Godts belt)
Ist eerste datter oyt is op de aert ghestelt,

Soo moet de Mael-const van des Schilders suyver wercken

Wel sijn van groote cracht, die t'wesen can bemercken

Van al het gen' den mensch in eenich litmaet heeft
Daer u den Schilder staegh een volle schets van gheeft,

En voeght die soo by een, en samen by malcand'ren

Dat t'leven en des' Const by een niet en verand'ren.

T'gen Sack tot Room bethoont met eenen grooten aert
In sijne Schilder-const, dat sijn verstant ons baert.