Het gulden cabinet van de edel vry schilderconst

Gaspar du Que
Tapijt-schilder van Roomen.

HEt leven wordt soo seer van Schilders handt vercracht,

Dat niet op d'aert en schuylt soo schoon om naer te speuren

Oft t'wordt al van Pictur naer t'leven voorts ghebracht,

Soo alsmen aen Du Qué siet hedensdaeghs ghebeuren.

Die t'levens schijn soo fraey door Const brenght op't Toneel,

Dat ick wel segghen mach den luyster van sijn jaeren

Bestraelt sijn wijs vernuft, en schuylt in sijn Pinceel

Die ons Picturas gheest compt daeghlijckx openbaeren.