Het gulden cabinet van de edel vry schilderconst

[p. 284]

Abraham a Diepenbeeck
Van 's Hertoghen Bosch.

MEn seyt voor een Maxiem, dat die de glasen maecken
Doorluchtich sijn van aert in al hun claere saecken

Om dat hun wercken sijn doorluchtich en seer licht

Die Titan daghelijckx doorschijnt met sijn ghesicht.

Dit ampt maeckt menich eel, ghelijck hier wort bevonden
In Abram Diepenbeeck schatkist der Schilders gronden.

Die eerst met suyver glas seer groote Const bedreeff

Als hy met sijn Pinceel daer op seer aerdich schreeff

En is daer door gheraeckt op d'eel Picturas trappen
Die van haer heeft gheleert de diepste wetenschappen

In't hand'len met Pinceel, en meest met crijt en cool

Al oft hy waer ghevoedt van jonghs in't Schilders school,

Seer gheestich, soet en net staen alle sijne dinghen
Soo datmen over al van hem hoort lofsanck singhen.

In de jnventien van teeck'nen aldermeest

Wort hy in Nederlant ghenoempt den cloecksten gheest:

Heel mals in't schilderen, seer los en poeselachtich,
Al t'gene dat hy maeckt, het staet al even crachtich

Sijn Meester Rubbens was daer hy heeft by gheleert

Waer by hy met dees Const ten hoochsten wert vereert.

De oeffeningh daer van hem daeghlijckx compt verwecken
Om meerder wetenschap met jever te ontdecken

Ghelijckmen speuren can aen al sijn edel werck

Waer med'dat hy verciert soo menich huys en Kerck.

De Gheesten die op plaet seer aerdich connen snijden
Die moeten altemael, en wel met recht belijden

Dat Diepenbeeck alleen den jersten is van t'Landt

In d'edel Teecken-const, door sijn sin rijck verstandt.

[p. 285]

ABRAHAM VAN DIEPENBEKE Est né a Boisleducq, ayant cÿ devant exercé pour quelque temps l'art de peindre sur les vitres, en quoij il surpasse tous ceux de son temps, mais a present sest addonné a peindre toute sorte de peincture mesmes aux desseins tres curieusement, aijant eu pour maistre Pierre Paul Rubbens, tient sa residence a Anvers.
Abr. a diepenbek pixit. Paul. Pontius sculpsit. Iean Meijssens excudit.

[p. 286]

Ghelijck alle dinghen (uyt een cleyn begin voortcomende) ten lesten sulcken volmaecktheyt aenneemt dat de Faem noyt vermoyt en wordt om t'selve tot verwonderinghe van alle menschen met lof ende eer te vercieren. Soo ist dat de edel Const van Pictura oock allenskens met een cleyn begin door de ghedurighe oeffeninghe ende aenghedreven gheest compt tot den hoochsten roem van glorie die onsterffelijck blijft en noyt en sal vergaen, ghelijck de wetenschap van glas schrijven den voorghenoemden Abraham van Diepenbeeck oock ghebrocht heeft tot den hoochsten trap vande volmaecktheyt die in Picturas verholen Consten te vinden zijn waer door de eer hem altijdt is volghende ende haer soo rijckelijck en opghepronckt van alle secreten wetenschappen der Consten aende Faem is verthoonende dat nimmermeer (emmers soo lanck daer Liefhebbers der Consten inde werelt sullen te vinden zijn) den lof van Diepenbeeck en sal vergaen, al ist dat sijnen gheest eens door het scheyden van het lichaem sal verdwijnen door den roem die de Faem nu daeghelijckx daer van is uytblasende ende verheffen sal sonder oyt te sterven Waerom dat den hoochgheleerden Joos van Vondel uytghemunt Poeët van Hollant sijn penne niet en heeft connen bedwinghen om t'selve ghelijck voorszeit is tot meerder lof van Diepenbeeck te bekennen: sprekende aldus.

Dus teeckende Abraham sich selven naer het leven

Wy kennen handt en gheest aen ommetreck en streeck

Sy vloyen even rijck, ghelijck een Diepenbeeck

T' wel schicken van Natuer aen weynighen ghegheven

Ist velt waer in hy weydt met fijn begaeft Pinceel

De vondt van 's mans vernuft ontsiet gheen sonne straelen
Noch selff Apelles oogh in Kercken en in Saelen

Laet tuyghen print en doeck, en koor-glas en panneel.